Rusizi: Ntibazi uburyohe bw’Ikawa bahinga, baheruka bayijyana ku ruganda

Abahinzi ba Kawa bo mu Murenge wa Nzahaha, ni hamwe muhabarizwa kawa nyinshi mu Karere ka Rusizi, gusa abayihinga ngo ntibazi uko imera baheruka bayijyana ku ruganda gusa.

Nubwo hari uburyo gakondoko bwo gutegura ikawa abaturage benshi batazi, abahinzi ba kawa muri aka gace ngo bategereje isezerano bahawe n’inganda zibagurira kawa zabemereye kuzaza kubasogongeza ku ikawa.

Havugimana Lazare, uri mu kigero cy’imyaka 60 yabwiye Umuseke ko ikawa y’u Rwanda abumvana abandi ko iryoha.

Ati “Numva ngo iraryoha gusa, yewe sinzi n’uko isa twumva mu nama bavuga ngo twahinze kawa iryoshye, n’aho ntuye ntaho wayibona, n’abatubwiye ko bazaduha kuri kawa twahinze amaso yaheze mu kirere usanga byitwa ngo turahinga ariko tutaranywa no kubyo duhinga.”

Ubuyobozi bw’Akarere ka Rusizi buvuga ko bagiye gushishikariza abagura ikawa kwegera abahinzi, ndetse bakabaha no kubyo bejeje.

Kankindi Leoncie, Umuyobozi w’Akarere ka Rusizi wungirije Ushinzwe ubukungu avuga ko ubundi umuturage afite uburenganzira bwo kurya no kunywa kubyo yeza.

Ati “(ikawa) iyo ivuye mu ruganda umuturage afite uburenganzira bwo kuyinywaho, mu musaruro beza ndumva batakabuze n’agapaki kamwe. Bigiye kwitabwaho natwe tugiye kuganira n’inganda ngo zishyireho uburyo bworoshye bwo kwegereza iyi kawa aba bahinzi.”

Ubu, ubuyobozi buri gufasha abahinzi ba kawa kongera umusaruro bubagezaho inyongeramusaruro, izagera ku biti bya kawa 5 620 000.

Abahinzi ba kawa mu Karere ka Rusizi kandi binubira igiciro cya kawa bahabwa n’Abasheteri (acheteur), kuko ngo babahera ku mafaranga 150 ku kilo kimwe.

Francois Nelson NIYIBIZI
UM– USEKE.RW