Ruremesha yagizwe umutoza mushya wa Etincelles, bamusabye igikombe

Emmanuel Ruremesha watozaga Gicumbi FC, yamaze gutangazwa nk’umutoza mukuru wa Etincelles FC, asimbuye Innocent Seninga, none yasabwe gutwara kimwe mu bikombe bikinwa mu Rwanda.

Mu ijoro ryo kuri uyu wa kane tariki 21 Nyakanga 2016 nibwo ubuyobozi bw’ikipe ya Etincelles FC bwakoze inama, bushimira umutoza Innocent Seninga wabafashije kutamanuka mu kiciro cya kabiri.

Seninga yafashe Etincelles mu mikino yo kwishyura iri ku mwanya wa 15 mu makipe 16 yari agize Shampiyona y’u Rwanda, yagerageje kwitwara neza, abona n’amanota mu mikino ikomeye irimo uwo batsinze APR FC 1-0, n’uwo banganyije 1-1 na Rayon sports i Kigali.

Byatumye Etincelles FC y’i Rubavu irangiriza ku mwanya wa 12 n’amanota 32.

Ukwitwara neza kwa Seninga, byamuhesheje kujya muri Police FC gusimbura Cassa Mbungo Andre wirukanwe.

Etincelles yamaze gutangaza Emmanuel Ruremesha nk’umusimbura wa Seninga.

Abayobozi ba Etincelles ariko ngo ntibashaka kongera kubona ikipe yabo mu makipe amanuka, ahubwo ngo barashaka kimwe mu bikombe bikinirwa mu Rwanda, nkuko bitangazwa n’umuyobozi wayo Mvano Etienne

“Turashima cyane Seninga. Gufata ikipe iri mu makipe ashobora kumanuka, agashobora gushaka amanota atwemerera kuguma mu kiciro cya mbere, tukanagera ku munsi wa nyuma nta gitutu kituriho, ni ibyo kwishimira cyane. Gusa kuko tutazakomezanya, twagombaga gushaka umusimbura hakiri kare, akadufasha kubaka ikipe y’umwaka utaha.

Ruremesha twamusinyishije imyaka ibiri y’amasezerano. Tuzamufasha kubona abakinnyi yifuza, Ariko tukibona mu makipe ahatanira kimwe mu bikombe tuzahatanira umwaka utaha.”- Mvano Etienne

Amakuru agera ku Umuseke aravuga ko nyuma yo gusinyisha umutoza, Etincelles yatangiye gushaka abakinnyi, barimo Bokota Labama.

Usibye Seninga wasohotse muri Etincelles FC ajya muri Police FC ashobora kujyana yo n’abakinnyi bayo nk’umunyezamu Nduwayo Danny bita Barthez, Habimana Hussein, n’uwari kapiteni wa Etincelles, Uwayezu Milapha.

Roben NGABO
UM– USEKE.RW