Rugema uba i Maputo yakoze indirimbo ivuga ibigwi bya Perezida Kagame

Rugema wahoze muri Orchestre Impala nshya yashinzwe muri 2014 usigaye wibera i Maputo muri Mozambique, yakoze indirimbo ivuga ibyiza Perezida Kagame amaze kugeza ku banyarwanda n’ubutwari bwe.

Nubwo ari muri Mozambique nk’umucuruzi, Rugema yabwiye Umuseke ko amarangamutima yamuhatiye gushimira Perezida Kagame ku bintu bitandukanye amaze guhindura ku Rwanda.

Avuga ko hari ibihugu byinshi muri Afurika bitigeze bihura n’ibibazo nk’ibyo u Rwanda rwanyuzemo mu 1994 ariko bikiri inyuma mu iterambere.

Kuba Perezida Kagame ari umwe mu bayobozi b’ibihugu bya Afurika ufatwa nk’intangarugero, ngo biha imbaraga buri wese ufite inkomoko mu Rwanda zo kwemera ubwenegihugu bwe.

Ati “Mu myaka 23 ishize u Rwanda ruvuye muri Jenoside yakorewe Abatutsi mu 1994 ninde wari uzi ko twaba dufite amahoro n’umutekano bingana bitya?! Ninde watekerezaga ko ikoranabuhanga rizaba rigeze aho rigeze? Ibi byose biri mu byo Perezida akwiye gushimirwa”.

Rugema avuga ko iyo ndirimbo ari akantu gato ugereranyije n’ishimwe yumva afite muri we yagenera Perezida ku bikorwa by’indashyikirwa yagejeje ku banyarwanda.

Nyuma y’iyo ndirimbo yise {Dutore Paul Kagame} yafatanyije n’undi muhanzi witwa J.A nawe wibera i Maputo, yiteguye kugeza ku banyarwanda indi y’intsinzi mu gihe amatora azaba arangiye.

Amashusho y’iyo ndirimbo yiganjemo amafoto yagiye afatwa n’ibitangazamakuru bitandukanye mu buryo bwo kwerekana urukundo abanyarwanda bakunzemo Perezida.

Joel Rutaganda

UM– USEKE.RW