Rubavu: Imiryango 100 y’abacitse ku icumu batishoboye inzu zirenda kubagwaho

Bamwe mu bacitse ku icumu batuye mu mudugudu wa Kibaya, Akagari ka Rugerero mu Murenge wa Rugerero bubakiwe mu 1999 n’Ikigega cya Leta gishinzwe gutera inkunga abarokotse Jenoside yakorewe Abatutsi batishoboye (FARG), baratangaza ko inzu bubakiwe bakazijyamo zituzuye zigiye kubagwaho bagasaba ubuyobozi kubasanira cyangwa byashoboka bakubakirwa izindi.

Nk’uko aba baturage babisobanura, ngo bagiye bagerwaho n’abayobozi batandukanye mu bihe bitandukanye bakabizeza ko mu gihe gito iki kibazo kizaba cyabonewe umuti ariko ngo amaso yaheze mu kirere.

Umwe muribo agira ati: “Aya mazu yubatswe hutihuti tuyinjiramo atazuye. Murabona ko yashaje burundu. Abantu benshi baradusuye bamwe baturutse i Kigali bakatwizeza ko bagiye kudufasha gusana ariko twategereje icyakorwa twarakibuze.”

Undi ati: “Iyo imvura iguye nijoro twitwikira imitaka kugira ngo turebe ko twaramuka, amazu yacu ararangaye , ibikoni byo byarasenyutse aho turyama niho dutekera mbese turutwa n’inyamaswa zo mu ishyamba!”

Aba baturage basaba inzego zitandukanye zita ku mibereho myiza y’Abanyarwanda kubatekerezaho bityo iki kibazo bamaranye igihe kikabonerwa umuti nabo bakabaho neza nk’abandi bubakiwe hirya no hino mu gihugu.

Ubuyobozi bw’Umurenge wa Rugerero bwemera ko bumaze igihe kirekire buzi iki kibazo.
Bwemeza ko bwakoze ubuvugizi mu nzego zo hejuru kugira ngo haboneke ubufasha bwisumbuyeho kuko ngo gukemura kiriya kibazo birenze ubushobozi bwabo nk’umurenge.

Uwajeneza Jeanette, uyobora  uyu murenge by’agateganyo ati: “ Bayatuyemo atuzuye neza bitewe na rwiyemezamirimo wagiye atayarangije bituma bayimukiramo kuko batari bafite aho kuba bityo yahise asaza. Ikibazo twakigejeje ku nzego zose bireba kuko gusana cyangwa kubaka ariya mazu bisaba ubushobozi burenze ubw’Umurunge wonyine.”

Uwajeneza yemeza ko kuyasana cyangwa kubaka andi mashya bisaba ko habanza gukorwa inyigo inonosoye kugira ngo hirindwe andi makosa y’imyubakire.

Gusa ngo nyuma yo gukora ubuvugizi hari Komisiyo nyinshi zagiye zihagera ndetse n’abashinzwe imyubakire muri FARG barahasuye bityo ngo hari ikizere cy’uko ziriya nzego hari icyo zizakora kiriya kibazo kigakemuka.

Aya mazu yubatswe n’Ikigega cya Leta gishinzwe gutera inkunga abacitse ku icumu rya Jenoside yakorewe Abatutsi batishoboye, FARG, muri 1999.

Icyo gihe hubatswe amazu 50, abiri abiri afatanye akaba atuwemo n’imiryango 100.
Kuri ubu amenshi muri yo, ibisenge byayo byarangiritse ku buryo abayarimo basanga kuyabamo nta tandukaniro rinini bifitanye no kuba hanze.

UM– USEKE.RW