Remera: Abatuye Kagara bugarijwe n’umwanda

Abatuye Umudugudu wa Kagara mu Kagari ka Nyabisindu, Umurenge wa Remera barasaba abashinzwe gukura imyanda iba yashyizwe ku muhanda mu mifuka kuyihakura vuba kuko ngo yatangiye kunuka kandi amasazi ayivaho ajya ku masahani bikaba byabanduza indwara.

Umwe mu baturage Umuseke waganiriye nawe hafi y’ahitwa kwa Musisi witwa Karemera yavuze ko bagiye kumara ukwezi barashyize imyanda hanze ngo imodoka zize ziyihakure ariko barategereje baraheba.

Kugeza ubu ngo ikibazo ni uko imwanda imwe n’imwe yatangiye kubora k’uburyo amasazi n’umunuko bitangiye kubazonga.

Yagize ati “Ibi bintu bimaze kurenza urugero turasaba ko ababishinzwe baza bakayikuraho vuba kuko isazi zimaze kuba nyinshi.”

Uyu mugabo avuga ko amahitwe bagize ari uko nta mvura iheruka kugwa vuba aha, ngo ubundi umwanda wari burusheho kuba mwinshi.

Umunyamabanga nshingwabikorwa w’Akagari ka Nyabisindu Francoise Niyonsaba yabwiye Umuseke ko ikibazo koko bakimenye ariko ngo ikibazo cyavutse ni uko Koperative yari ifite amasezerano yo gukuraho iriya myanda yitwa COOPEDE yahagaze ngo bakaba bategereje ko hari indi iri butangire iyi mirimo kuri uyu wa kane.

Ati “Ndi mushya mu mirimo muri aka Kagari ariko icyo kibazo ndakizi. Abari bashinzwe gukuraho iyi myanda barahagaze, ubu hashize ibyumweru bibiri birenga. Gusa abakora muri iyo Koperative iri bukureho iriya myanda batubwiye bitarenze saa kumi z’uyu munsi bari bube bayikuyeho, bityo rero haracyari kare ngo tuvuge ko batakiyikuyeho.”

Niyonsaba avuga ko bishoboka ko iyi Koperative nshya iza gukuraho imyanda ishobora kuba yarahuye n’ibibazo runaka hakabaho gutinda ariko ngo nibirenga  kuri uyu wa kane tariki ya 01 Kamena 2017 bari butangire gukeka amababa iriya Koperative.

Umwe mu baturage b’aho yabwiye Umuseke ko sa kumi n’imwe zageze ibishingwe bitaravanwa aho byashyizwe bityo ngo ikizere cy’uko bizahava vuba kikaba cyagabanutse.

Jean Pierre NIZEYIMANA
UM– USEKE.RW