Rayon yanyagiye Etincelles iyisanze i Rubavu

Ibitego bitanu ni byo Rayon Sports yatsindiye i Rubavu itsinda Etincelles, Police i Musanze itsinda ku munota wa nyuma ubwo shampiyona yakinwaga umunsi wayo wa 23.

Kuri uyu munsi ikipe ya As Muhanga nyuma yo kunganya na Police ku mukino uheruka, kuri Stade yayo ntago yaje kubyitwaramo neza dore ko yahatsindiwe na Mukura igitego 1-0 cya Michel.

Ikipe y’Isonga kuri Stade Amahoro yari yahakiriye Kiyovu Sports gusa birangira Kiyovu kera kabaye ibonye amanota atatu nyuma y’uko ibitego bya Tuyisenge Pekeyake Pekinho, Masudi Kaka ndetse n’igitego Isonga yitsinze byatumye batsinda Isonga 3-1.

Kuri Stade ya Kigali ikipe ya APR FC yakinaga na As Kigali ku mukino umwe muri 2 yakinirwaga mu mujyi wa Kigali. Ikipe AS Kigali itozwa na Cassa Mbungo yaje guhura n’uruva gusenya kuko yatsinzwe na APR FC ibitego 3-0. Sekamana Maxime umaze iminsi witwara neza ni we wafunguye amazamu mbere yuko Yannick na Nova Bayama abasore bato ba APR batsinda nabo.

Indi mvura y’ibitego yaje kubera i Rubavu aho Rayon Sports yanyagiriraga Etincelles ku kibuga cyayo ibitego5-0. Hamiss Cedric yaje gutsinda ibitego bitatu muri uyu mukino harimo kimwe cyiza cyane cya Coup Franc mu gihe Kambale Salita Gentil na we yatsinze ibindi bibiri. Cedric umukino ushize akaba atari yawukinnye.

Police ikomeje kwiruka inyuma ya Rayon nayo yashoboye kwikura i Musanze dore ko umukinnyi wayo Ndahayo Eric yayaitsindiye igitego mu minota ya nyuma byatumye batsinda Musanze 1-0.

Uyu munsi wa 23 usa nkaho utahiriye amakipe yasuye dore ko ikipe y’Amagaju i Nyamagabe yaje kuhatakariza umukino wa mbere itsinzwe kuva igice cyo kwishyura cyatangira. La Jeunesse ni yo yaje kubigeraho dore ko igitego cya Guilain mu minota ya mbere cyabafashije gutsinda Amagaju 1-0.

Marines FC yo ikomeje kwiyongerera amahirwe yo kuguma mu cyiciro cya mbere ubwo yongeye kwikura i Rusizi ubwo yanganyaga na Espoir 1-1.

Inkuru dukesha Ruhagoyacu.com

UM– USEKE.COM