Rayon Sports yatsinze Marines 3 – 0, ihita iba iya mbere

Kigali – Kuri iki cyumweru umunsi wa 16 wa shampiyona usize Rayon sports iyoboye urutonde rwa shampiyona y’u Rwanda by’agateganyo, nyuma yo gutsinda Marines FC 3-0, naho Mukura igatsindwa na Police 1-0.

Kuri stade ya Kigali i Nyamirambo ku munota wa gatatu gusa rutahizamu Devis Kasirye yafunguye amazamu n’umutwe, nyuma ya ‘corner’ yari itewe na Manishimwe Djabel.

Ku munota wa 19, uyu munya Uganda yaje kuroba umuzamu wa Marine Habarurema Christopher bita Gahungu, atsinda igitego cya kabiri muri uyu mukino, kikaba icya munani muri shampiyona y’uyu mwaka.

Ku mupira yahawe na Imanishimwe Emmanuel ku munota wa 25, umunya Mali Ismaila Diarra yatsinze icya gatatu cya Rayon sports yagaragazaga imbaraga nyinshi mu gice cya mbere.

Mu gice cya kabiri, abasore b’umutoza Nduhirabandi Abdoul Karim bita Coka ba Marines bagarutse bagaragaza inyota y’igitego. Byatumye Itangishaka Blaise abona uburyo butatu bwashoboraga kubyara igitego, ariko umuzamu Ndayishimiye Eric bita Bakame akomeza guhagarara neza kugeza umukino urangiye.

Nyuma y’uyu mukino, Masudi Djuma uri gutoza Rayon yavuze ko guhindura ‘system’ bakina, agakoresha abakinnyi benshi basatira ari byo biri kumufasha kwitwara neza.

Naho Nduhirabandi we ngo abafana ba Rayon sports bari buzuye stade Regional ya Kigali, ni kimwe mu byagoye abasore be.

“Ni ubwa mbere dukiniye imbere y’abafana benshi muri iyi shampiyona. Abasore banjye bamenyereye ko bagendera ku mabwiriza mbaha no mu mukino hagati, ariko uyu munsi ntibyashobokaga kubera urusaku rw’abafana benshi barebye uyu mukino.” – Nduhirabandi Abdoul Kari Coka.

Rayon Sports ifashe umwanya wa mbere n’amanota 35, ni nyuma yo ikurikiwe na APR FC n’amanota 34.
Mu yindi mikino yabaye kuri iki cyumweru, ku Kicukiro, Mukura Victory Sports ya gatatu n’amanota 32, yatsinzwe na Police FC ya kane n’amanota 31, igitego 1-0 cya Twagizimana Fabrice bita Ndikukazi.

AS Kigali yanganyije na Rwamagana City FC 0-0 naho Musanze FC itsindwa na Sunrise FC 1-0 cya Alexis Nkomezi.
Umunsi wa 16 wa shampiyona

Kuwa Gatanu

SC Kiyovu 3-2 Bugesera FC
Espoir 0-0 AS Muhanga
APR FC 0-1 Etincelles FC
Amagaju FC 0-0 Gicumbi FC

Ku Cyumweru

Police FC 1-0 Mukura VS
Rayon Sports 3-0 Marines
Rwamagana City FC 0-0 AS Kigali
Musanze FC 0-1 Sunrise FC.

 

Roben NGABO
UM– USEKE.RW