Rafiki iwe mu rugo, mu muziki no kugaruka kwe

Rafiki Mazimpaka araho, aracyakora muzika nubwo amaze iminsi atumvikana mu bahanzi bakomeye mu Rwadna nk’uko byari byifashe mu myaka igera ku 10 ishize. Umuseke wasuye iwe mu rugo uyu mugabo wazanye injyana yise Coga Style mu Rwanda. 

Rafiki wibukwa mu ndirimbo yakunzwe cyane nka “Tukabyine” yafatanyije na Miss Jojo, atuye ku Kicukiro mu murenge wa Kagarama, abana n’umugore we n’umwana wabo w’imfura y’umuhungu.

Mu gitondo akibyuka avuga ko ahera ku gusenga asaba Imana guhaha akaronka no kuza gutaha mu rugo amahoro avuye muri gahunda ze z’umunsi.

Rafiki uvuga ko atunzwe na muzika gusa, abyuka mbere y’abandi mu rugo akabyutsa umwana ugomba kujya ku ishuri n’umugore ujya ku kazi.

Umwanya we munini awukoresha mu gukora imyitozo yo kugorora amajwi abifashijwemo n’abamucurangira baza gukorera iyo myitozo iwe mu rugo.

Rafiki yigeze guherekeza ikipe y’u Rwanda y’abatarengeje imyaka 17 mu gikombe cy’Isi muri Brazil ndetse akanatoranywa mu bari kujya muri Rwanda Day i Chicago ariko ntibishoboke kubera irushanwa yarimo ya Primus Guma Guma Super Star ya mbere.

Nyuma y’igihe atagaragara cyane muri muzika yabwiye Umuseke ko uyu mwaka wa 2015 yifuza ko utaba nk’indi kuko yifuza kugaruka mu bahanzi bakomeye.

Muri uyu mwaka aherutse gusohora indirimbo yakoranye na Dream Boys yitwa ‘Gasopo’, yatangaje ko ari gutegura ibitaramo hirya no hino mu gihugu, no gukomeza gukora izindi ndirimbo nshya zifite ubutumwa n’inyigisho ku banyarwanda.

Iras Jalas & Rutaganda Joel
UM– USEKE.RW