Producer Fazzo arishyuzwa ibihumbi 400 na Touch Records

Fazzo wari usanzwe akorera muri Touch Records arishyuzwa amafaranga ibihumbi magana ane by’imashini (Computer) yakorerwagaho imirimo y’iyo studio yaje kujyana ntayigarure.

Ibi byatangajwe n’umwe mu bashinzwe umutungo muri iyo studio witwa Hubert. Anavuga ko Fazzo nubwo atirukanywe ku mugaragaro muri iyo nzu yabimenye mbere akiyirukana.

Kuri iki cyumweru Hubert yatangarije Isango Star ko Producer Fazzo ashinjwa kuba yarajyanye imashini ‘Computer’ ifite agaciro k’ibihumbi 400. Ndetse anavuga ko atakibarizwa muri Touch Records.

Mu kiganiro Fazzo yagiranye na Umuseke, yavuze ko atigeze yiba imashini. Ahubwo ko hari ibyo yagombaga kubanza kuyikuramo igihe cyose bayishaka ko baza bakayifata.

Anemera ko atagikorera muri Touch Records gusa hari ibyo bamugomba batari bamuha nk’umuntu bari bafitanye amasezerano akaza guhagarikwa mu buryo budasobanutse.

Mu mpera z’umwaka wa 2015 muri iyo studio hagiye havugwamo kutumvikana hagati y’ubuyobozi ndetse n’abahanzi bakoreramo ibyo bitaga nk’agasuzuguro.

Byaje gutuma bamwe mu bahanzi barimo, Green P, Tony, Producer Gilbert n’abandi basezera muri iyo nzu.

Bidatinze iyo nzu yaje kwirukana uwitwaga Clesse bivugwa ko ariwe wari inyuma y’isezera ry’abo bahanzi. Mu mpera za Mutarama 2016, na Jay Polly yaje kuva muri iyo nzu.

Joel Rutaganda

UM– USEKE.RW