“Producer Fazzo aracyari mu biganiro na Kina Music”- Clement

Ishimwe Clement umuyobozi w’inzu itunganya ibihangano by’abahanzi izwi nka Kina Music ndetse akaba na Producer w’iyo studio, aratangaza ko bakiri mu biganiro na Fazzo producer ukorera muri Touch Records ngo abe yaza gukorera muri Kina Music ariko ibiganiro bitari byarangira.

Ibi abitangaje nyuma y’aho hari amakuru yavugwaga ko uyu mu producer Fazzo yaba yamaze kugirana amasezerana na Kina Music.

Mu kiganiro na UM– USEKE, Ishimwe Clement yatangaje ko ibiganiro hagati yabo bitari byafata icyemezo icyo aricyo cyose.

Yagize ati “Yeah, koko turi mu biganiro na Fazzo ariko ntabwo twari twafata icyemezo icyo aricyo cyose kuko turacyari mu biganiro, gusa bishobora kurangira vuba, ariko kuba yamaze kuza muri Kina Music ntabwo aribyo”.

Abajijwe imwe mu mpamvu itumye arimo gushaka kuzana Fazzo muri Kina Music, yakomeje atangaza ko hari akazi kenshi afite bityo ariyo mpamvu ashaka Fazzo kuba yaza kumufasha. Gusa ngo ibyo kuba yareka production ntabwo birimo.

Kina Music n’inzu ikorerwamo n’abahanzi bakomeye nka, Dream Boys, Knowless, Tom Close, Christopher na Gisa Cy’Inganzo utari wasinya amasezerano ariko biri mu nzira nawe.

Joel Rutaganda

ububiko.umusekehost.com