Primus Guma Guma Super Star irongeye iraje

Benshi bari bamaze iminsi bibaza iby’irushanwa rya Primus Guma Guma Super Star. Umunsi urashyize uragera kuko none aribwo abahanzi bazahatana muri iri rushanwa rigiye kuba ku nshuro ya gatatu batorwa n’abanyamakuru.

Primus Guma Guma Super Star ya mbere ntiyari ifite imbaraga nyinshi cyane kuko itari imenyerewe n’Abanyarwanda ariko bigeze kuya kabiri yarushijeho kuryoha ndetse irashyuha karahava.

Ubu igikomeje kwibazwa na benshi ni uburyo iri rushanwa rimaze gutera intambwe rizagenda kuri iyi nshuro ya gatatu, dore ko hari byinshi byanenzwe muri Primus Guma Guma Super Star ya Kabiri.

Kugeza ubu ntibiramenyeka niba abanyamakuru bagiye guhitamo abahanzi bazitabira PGGSSIII bongera gutora abahanzi 20 nk’uko umwaka ushize byagenze. Ntibiramenyekana kandi niba iri rushanwa risongera kumara amezi nk’ayo ryamaze dore ko benshi bari bifuje ko ritabangikana na Tusker Project Fame nayo iba irimo Abanyarwanda.

Impamvu abakurikiranira umuziki hafi bari bifuje ko PGGSS yatandukana na Tusker Project Fame ni uko Umuhanzi w’Umunyarwanda Jackson Kalimba yavuye muri iri rushanwa ku munota wanyuma; benshi bakaba bemeza ko byatewe n’uko yabuze amaboko y’Abanyarwanda bari bahanze amaso abahanzi bari muri PGGSSII.

Ubwo yabaga ku nshuro yayo ya mbere Primus Guma Guma Super Star yegukanywe n’Umuhanzi w’Umunyarwanda uririmba mu njyana ya RnB Dr Muyombo Thomas uzwi cyane ku izina rya Tom Close wari uhanganye na King James.

Ku nshuro ya kabiri PGGSS nabwo yegukanwe n’umuririmbyi uririmba mu njyana ya RnB (ubu asigaye anaririmba indirimbo ziri mu njyana ya Afro beat) Ruhumuriza James uzwi cyane ku izina rya King James wari uhatanye n’umuririmbyi uririmba mu njyana ya Hip Hop Tuyishimire Joshua uzwi cyane nka Jay Polly.

Ubu ibyibazwa na benshi ndetse gihurirwaho n’aho twagiye tuganira ni ibintu bibiri: Ese ninde uzegukana PGGSSIII ko iy’ubushize yari amashiraniro? Ibyo twari twifuje ko byahinduka se bizahinduka kuri iyi nshuro?

Plaisir MUZOGEYE
UM– USEKE.COM