Polisi y’u Rwanda na Uganda basuzumye imikoranire yabo

17 Gashyantare 2015 – Kuva mu mwaka w’i 2000 Polisi y’u Rwanda n’iya Uganda basinye amasezerano y’imikoranire mu gukumira ibyaha byambukiranya imipaka no guhanahana amakuru n’abanyabyaha nk’ibihugu bituranyi. Inama ngarukamwaka ihuza ubuyobozi bw’izi nzego ngo isuzume uko iyi mikoranire ihagaze uyu munsi yateraniye i Kigali ku kicaro cya Polisi y’u Rwanda ku Kacyiru.

Ku ruhande rw’u Rwanda hari Komiseri mukuru wa Polisi y’u Rwanda IGP Emmanuel Gasana, ku ruhande rwa Uganda intumwa zabo zari ziyobowe na Komiseri mukuru wungirije wa Polisi ya Uganda DIGP John Martins Okoth-Ochola.

CSP Celestin Twahirwa Umuvugizi wa Polisi y’u Rwanda nyuma y’iyi nama yabwiye abanyamakuru ko abayobozi bombi basanze imikoranire hagati y’izi nzego z’umutekano yifashe neza muri rusange.

CSP Twahirwa yibukije ko Uganda iherutse koherereza abanyabyaha u Rwanda, barimo na Jean Paul Birindabagabo wahafatiwe wahamwe akanakatirwa ku byaha bya Jenoside mu Nkiko Gacaca mu Rwanda.

Avuga kandi ko Polisi z’u Rwanda na Uganda zihanahana amakuru kenshi mu gufata no gukumira ibyaha by’ubujura, icuruzwa n’ibiyobyabwenge n’icuruzwa ry’abantu.

Muri iyi nama yarimo kandi n’abandi bayobozi ku nzego nkuru ba Polisi z’ibihugu byombi yanzuye ko imikoranire ikwiye kurushaho kuba myiza no kwihuta cyane mu gukumira ibyaha no guhana amakuru ku byaha ku buryo bwihuse cyane.

Mbere y’ubu bufatanye ngo guhererekanya abanyabyaha byashoboraga gufata umwaka bitarakorwa.

Asobanura itandukaniro ry’ubu bufatanye n’uburyo bwa INTERPOL, CSP Twahirwa yavuze ko uburyo bwa Interpol amakuru runaka ku byaha cyangwa abanyabyaha atangwa ku isi hose mu gihugu kiri muri INTERPOL maze igihugu umunyabyaha afatiwemo cyose agahita yoherezwa, gusa ubu bufatanye hagati ya Polisi z’ibihugu buka bwo bukorwa mu buryo butaziguye (direct) mu gufata abanyabyaha no kubahana.

J.Paul Nkundineza
UM– USEKE.RW