Polisi yamuritse igitabo cy’amateka yayo mu Rwanda

Kuri uyu wa 31 Nyakanga Polisi y’igihugu yamuritse igitabo gikubiyemo amateka ya Polisi y’u Rwanda gikubiyemo ahanini amateka y’umutekano w’abaturage b’u Rwanda kuva mbere ya Jenoside kugeza ubu ndetse n’icyerekezo gihari mu kurindira umutekano abatuye u Rwanda.

Mu muhango Ministre w’Intebe mushya Anastase Murekezi yari ahagarariyemo Perezida Kagame, iki gitabo cyasobanuwe na Commissioner of Police Felix Namuhoranye wavuze ko aya mateka mateka hari abayavuga uko atari bityo Polisi yashatse kuyavuga uko ari.

Iki ni igitabo cyanditswe n’itsinda ry’inzobere muri Polisi y’u Rwanda kigizwe n’ibice bitandukanye, cyanditswe mu rwego rwo kumva no kumvikanisha amateka y’umutekano na polisi mu Rwanda.

Mu kwandika iki gitabo hakoreshejwe uburyo butandukanye harimo kubaza abanyarwanda , abanyamahanga, abantu bafite imyaka 100 cyangwa irenga, abakoze mu nzego z’umutekano za cyera mu gihe cy’ubukoloni, polisi ya nyuma y’ubukoloni, mbere gato ya Jenoside, nyuma ya Jenoside no kugeza ubu.

Iki gitabo kigaragaza kandi uburyo bushya bwa Polisi y’u Rwanda bwo guha abaturage uruhare runini mu kwirindira umutekano Polisi ikaba umufatanyabikorwa.

CP Felix Namuhoranye ati: “Hari byinshi ubu bishimwa, birimo ‘community policing’ aho abaturage dufatanya nabo kurinda umutekano, nibwo buryo bwifuzwa ni nako bikwiye guhora.”

CP Namuhoranye avuga ko bifuza ko abaturage bagira ikizere muri Polisi yabo, babona umupolisi ntibamubone nk’umuntu ubarwanya ahubwo nk’umufatanyabikorwa mu kwirindira umutekano.

Ministre w’Intebe Anastase Murekezi yasabye Polisi kudahagarika uyu muco wo kwandika ndetse anasaba abanyarwanda kugira umuco wo gusoma kuko aribyo soko y’ubumenyi nyabwo.

Kera ngo umupolisi umuturage yamubonagamo umwanzi, ubu ngo Polisi y’u Rwanda irifuza ko umuturage abona umupolisi nka mugenzi we ashobora kuyoboza no kumwisanzuraho bityo bagafatanya kurinda umutekano.

Ati “ Turifuza ko umupolisi agira uruhare rugaragara mu iterambere ry’umuturage, niko polisi yacu yubatse, niyo gahunda dufite ni nacyo cyerekezo umuyobozi w’igihugu cyacu ashaka kuri polisi ya none, niyo mpamvu twanditse amateka nk’aya ngo tugaragaze itandukaniro rihari n’iryo dushaka.”

Muri uyu muhango Polisi y’igihugu yashimiye abantu babafashije mu kwandika kiriya gitabo barimo Prof. Goroba Mutebi Frederick, Dr. Nozen Rugira, n’umudamu witwa Yvonne bari mu itsinda ry’abashakashatsi, bakoresheje bakusanya amakuru y’uko abaturage bazi amateka ku mutekano u Rwanda.

Muri uyu muhango hahembwe uturere two mugihe twagiye dukora neza ku isuku ndetse no gufatanya na Polisi kurinda umutekano, hahembwe Umurenge wa Kinyinya mu mujyi wa Kigali, Akarere ka Rusizi mu ntara y’Iburengerazuba, Kirehe mu ntara y’uburasirazuba, Burera mu ntara y’amajyaruguru, uturere twahawe  ibihembo by’amamodoka ya Totoya Hilux naho Umurenge wa Kinyinya uhabwa imodoka y’ikamyo itwara imyanda.

 Photos/Faustin NKURUNZIZA

Daddy Sadiki RUBANGURA
UM– USEKE.RW