Police FC yahagaritse abakinnyi 3 bazira gusuzugura umutoza
Mugabo Gabriel ni umwe muri ba myugariro Police FC yagenderagaho
Umunsi umwe mbere yo gukina na Bugesera, Police FC yahagaritse abakinnyi batatu; Turatsinze Héritier, Mugabo Gabriel na Isaac Muganza, ibashinja kugumura abandi, no gusuzugura umutoza.
Police FC ntiyatangiye neza umwaka w’imikino 2016-17. Muri AS Kigali Pre seasonTournament yasezerewe mu matsinda itsinzwe imikino ibiri, inganyije umwe. Ntiyanatangiye neza shampiyona kuko yatsinzwe na Rayon sports 3-0 mu mukino ufungura.
Nyuma y’uku gutangira nabi, habaye ibiganiro hagati y’ubuyobozi, abatoza n’abakinnyi ba Police FC. Hashakiwe hamwe impamvu y’umusaruro mubi, banafata ingamba zatuma ibi bikosoka.
Mu myanzuro yavuye muri ibi biganiro, harimo guhana no guhagarika bamwe mu bakinnyi ba Police FC, bivugwa ko basuzuguye abatoza, bakanateza umwuka mubi mu ikipe.
Umuvugizi wa Police FC, CIP Mayira Jean de Dieu yabwiye Umuseke ati: “Nyuma yo kudatangira neza, icyo twakoze ni ukuganiriza abakinnyi kandi twizeye ko hari umusaruro bizatanga mu mikino itaha. Ibyo kuba hari abakinnyi batatu twahagaritse ni ibintu byacu imbere mu ikipe sinabitangazaho byinshi.”
Yavuze ko byakozwe nyuma yo gushaka impamvu zo kumara igihe Polisi idatsinda.
Ati “Ni byo Mugabo, Héritier, na Muganza twabahagaritse igihe kitazwi, kuko hajemo ibibazo byo kutumvikana n’abatoza.”
Police FC ubu iri ku mwanya 15 mu makipe 16 ari ku rutonde rwa shampiyona, nta nota ifite, ifite umwenda w’ibitego bitatu.
Kuri uyu wa gatandatu tariki 22 Ukwakira 2016, kuri Stade ya Kicukiro Police FC izahakirira Bugesera FC iyoboye urutonde rwa Shampiyona.
Roben NGABO
UM– USEKE.RW
English