Police FC irasura Kiyovu sports idafite Habimana Hussein        

Umukino w’umunsi wa 26 wa shampiyona y’u Rwanda ‘AZAM Rwanda Premier League urakomeza mu mpera z’iki cyumweru. Umukino ukomeye urahuza Kiyovu Sports na Police FC ikina idafite myugariro Hussein Habimana.

Kuri uyu wa gatanu tariki 5 Gicurasi 2017 kuri stade Umumena hari umukino uhuza amakipe akomeye mu Rwanda. Kiyovu sports irakira Police FC zombi zifite icyo zirwanira.

Police FC yatsinzwe na Kiyovu sports umukino ubanza iraza muri uyu mukino ishaka amanota atatu ngo ikomeze kotsa igitutu ya kabiri nkuko Seninga Innocent uyitoza yabitangarije Umuseke.

“APR FC ituri imbere iraturusha amanota atatu gusa. Turacyafite imikino myinshi imbere. Turifuza amanota yose byagenda neza tukarangiza ku mwanya wa kabiri.”

Uyu mutoza arajya muri uyu mukino yishimira gusubirana abakinnyi benshi bavuye mu igeragezwa ry’ingufu mu ikipe y’igihugu Amavubi. Barimo; Danny Usengimana, Mico Justin, Muvandimwe JMV, Nzarora Marcel, Mpozembizi Muhamed, na Ngendahimana Eric.

Gusa iyi kipe iheruka kunganya na APR FC 1-1 irakina idafite usanzwe abanza mu kibuga mu mutima wa ba myugariro Habimana Hussein bita Eto’o kuko yujuje amakarita atatu y’umuhondo.

Kiyovu sports irajya muri uyu mukino idashaka gutakaza inota na rimwe kuko iri mu makipe ahatanira kutamanuka mu kiciro cya kabiri. Iri ku mwanya wa 13 n’amanota 25, irusha Marines FC iyikurikiye amanota abiri, ikarusha Gicumbi FC ya 15 amanota ane gusa.

Kanamugire Aloys uyitoza yabwiye abanyamakuru ko nta kosa na rimwe bemerewe gukora muri uyu mukino. Ati: “Iyi mikino ya nyuma ni imikino y’ubuzima bwacu muri Kiyovu. Mfite ikizere cyo kwitwara neza kuko turakinira ku kibuga cyacu, twatsinze imikino iheruka kandi na Police FC tuzi icyo kuyitsinda bisaba. Dufite icyo turwanira kubarusha nicyo kitwongerera imbaraga.”

Kiyovu sports irajya muri uyu mukino idafite myugariro wayo Ahoyikuye Jean Paul wujuje amakarita atatu y’umuhondo.

Imikino yose y’umunsi wa 26 wa shampiyona

Kuwa gatanu

• SC Kiyovu vs Police Fc (Stade Mumena, 15:30)

Kuwa gatandatu

• APR Fc vs Espoir Fc (Stade de Kigali, 15:30)
• Gicumbi Fc vs Sunrise Fc (Gicumbi, 15:30)
• Bugesera Fc vs Musanze Fc (Bugesera, 15:30)
• Etincelles Fc vs AS Kigali (Stade Umuganda, 15:30)
• Amagaju Fc vs Mukura VS (Nyagisenyi, 15:30)

Ku cyumweru

• Rayon Sports vs Kirehe Fc (Stade de Kigali, 15:30)
• Pepiniere Fc vs Marines Fc (Stade Ruyenzi, 15:30)

Abakinnyi bari mu bihano batemerewe gukina
1. Mwiseneza Daniel (Mukura VS)
2. Habimana Hussein (Police Fc)
3. Omaviare Samson Babuwa (Sunrise Fc)
4. Ahoyikuye Jean Paul (SC Kiyovu)

Roben NGABO

UM– USEKE