PGGSS6: Uko byari byifashe i Nyamirambo mu gitaramo cya mbere cya Full Live (Amafoto)

i Nyamirambo ahazwi cyane nka Tapi Rouge niho habereye igitaramo cya mbere cya full live cy’irushanwa rya Primus Guma Guma Super ririmo kuba ku nshuro yaryo ya gatandatu.

Abahanzi bose uko ari 10 barimo guhatanira kwegukana iri rushanwa nta n’umwe ufite cy’uburwayi cyangwa se indi mpamvu y’indi yatuma ataza guhatana.

Nk’uko bimaze kumenyerwa cyane hano mu Rwanda, iri rushanwa ni hamwe mu hantu hahurirwa n’abantu benshi bavuye ingeri zose baje gushyigikira abahanzi babo bafana guhera mu mwaka wa 2011.

Kuri Tapi Rouge harimo kubera iki gitaramo, abantu ni urujya n’uruza mu mihanda yose igize Umurenge wa Nyakabanda mu Karere ka Nyarugenge bose baza kureba umuhanzi uri bwitware neza muri iki gitaramo cya mbere cyo kuririmba by’umwimerere ‘Live’.

Iri rushanwa ririmo kuba ku nshuro ya gatandatu, ritandukanye cyane n’andi atanu yose yaribanjirije. Aho bitandukaniye cyane ni ku buryo bw’imitegurire y’ibitaramo bizariranga.

Kuko nibwo hazakorwa ibitaramo umunani gusa mu gihe ubundi bitaramo byaba birenga 15 byazengurukaga Intara zose z’u Rwanda n’Umujyi wa Kigali. Muri ibyo umunani hakaba hazagaragaramo bitandatu gusa bizaba ari full live.

Biteganyijwe ko nyuma y’aha, hazakurikiraho Ngoma ho mu Ntara y’Iburasirazuba. Naho aba bahanzi bose bakazaririmba full live mu rwego rwo kurushaho kongera amanota y’ugomba kuzarusha abandi akaryegukana.

Ubu haribazwa ushobora kwegukana iri rushanwa nyuma y’aho ryegukaniwe na Tom Close, King James, Riderman,Jay Polly na Knowles ari nawe mukobwa wenyine umaze kuryegukana.

Ninde ushobora guha amahirwe yo kwegukana iri rushanwa hagati ya Urban Boys, TBB, Umutare Gaby, Young Grace, Christopher, Bruce Melodie, Danny Nanone, Jules Sentore, Danny Vumbi na Allioni?

Photos:Evode Mugunga/UM– USEKE

Joel Rutaganda

UM– USEKE.RW