Pastor Gaby yateguye umugoroba wo kuramya

Ku nshuro ya kabiri Pastor Ngamije  Semugeshi Gabriel ukoresha izina rya {Pastor Gaby} mu ivuga butumwa, afatanyije na Claire Semugeshi mushiki we, bateguye umugoroba wo kuryamya ku bakristo bose.

Pastor Gaby na Claire bava mu itorero rya  Great Commission Ministry {GCM } bavuga ko uwo mugoroba wo kuryamya bateguye, bifuza ko benshi mu bakristo bazarushaho kwimika Imana mu mitima yabo.

Iki ni igikorwa ngaruka mwaka bise “Christocentric Worship Night” kiba kigamije kuramya gushingiye kuri Yesu akaba ari we “Centre” mu mibereho yabo akaba umuyoboro ubahuza n’ukwemera Imana.

Mu kiganiro Pastor Gaby yagiranye na Umuseke yavuze ko uwo mugoroba wo kuramya ari iyerekwa Imana yabahaye. Nk’abaramyi , nka abahanzi ngo iki nicyo gihe cyo kugarura Yesu akima.

Ati “ Yesu niwe ukwiye kwamamara kurusha uko amazina yacu yamamara. Niwe ukwiye kuba centre mu mashuri yacu, mu buhamya bwacu hanyuma no mu buryo dukora muzika Yesu akaba ari we centre”.

Pastor Gaby avuga ko impamvu y’uwo mugoroba nta yindi ari uko Yesu ariwe bakomoraho agakiza. akabagira abo ari bo uyu munsi .

Uretse kuba harateguwe uwo mugoroba wo kuramya, Pastor Gaby atunga agatoki bamwe mu bahanzi ba Gospel bakora ibitaramo amazina yabo akaba ariyo yamamara cyane kurusha uko iry’Imana ryamamaye.

Biteganyijwe ko icyo gitaramo cy’umugoroba wo kuramya kizaba tariki ya 14 Gicurasi 2017, kizabera kuri kuri New Life Bible Church ku Kicukiro.

Muri icyo gitaramo hakazaba harimo abandi bahanzi baririmba Gospel barimo Aime Uwimana , Rene Patrick n’itsinda ry’abaririmbyi basanzwe baririmbana.

Daddy SADIKI RUBANGURA

UM– USEKE.RW