P.Bizimana wahombye miliyoni 10 mu gitaramo, MTN Tap&Pay izamufasha kutongera kwibwa
Patient Bizimana aherutse gutangaza ko yahombye miliyoni 10 Frw mu gitaramo
Nyuma y’igitaramo cya Patient Bizimana umuhanzi nyarwanda uririmba indirimbo ziramya Imana (Gospel) cyitabiriwe n’abantu batari bake aho cyarimo n’umuhanzi wo muri Afurika y’Epfo, Pst. Solly Mahlangu, mu gitaramo cya Easter Celebration 2016, Bizimana yavuze ko mu mafaranga yinjije hagaragayemo igihombo cya Miliyoni 10 zisaga zaburiwe irengero, ubu MTN yiteguye kumufasha.
Mu kiganiro Umuseke wagiranye na Bizimana yadutangarije ko mu gitaramo cye, amafaranga agera kuri miliyoni 10 yaburiwe irengero (yibwe). Yavuze ko bakiri mu iperereza ngo bamenye ababikoze, kandi bazahanwe.
Ati “Ntabwo nshaka kujya mu bisobanuro byinshi kuri ibyo, gusa isura mfite kugeza ubu ni uko igitaramo cyanjye cyagenze neza, kandi abakunzi b’indirimbo zanjye na Gospel muri rusange baranezerewe, ni cyo kintu cyanshimishije kurusha ibindi.”
Ku nshuro ya gatatu Patient Bizimana yateguye igitaramo ngaruka mwaka yise ‘Easter Celebration’ kizabera muri Radisson Blu Hotel ku Kimihurura tariki ya 16 Mata 2017, umutera nkunga we, ari yo Sositeye ya MTN izamufasha kuba atazongera kwibwa.
Umuseke waganiriye na Alain Numa ushinzwe imenyekanishabikorwa muri MTN, avuga ko bagiye gufasha Patient Bizimana kugira ngo ikibazo yahuye na cyo ubushize kitazongera kubaho.
Ati “Kuko turi abaterankunga ba Patient Bizimana, twashyizeho uburyo bworoshye bwakorohera umuntu wese, twanamugiriye inama kugira ngo hatazagira umuntu uzongera kumwiba.
Patient Bizimana twamuteye inkunga, rero twashyizeho uburyo bwa MTN Tap & Pay kugira ngo abakozi bose bazabe bahari kandi uko kwishyura kose bizakorwa kuri SimCard, iyo SimCard izaba ari ya Patient Bizimana.”
Alain Numa avuga ko Patient Bizimana wenyine azikuriramo amafaranga kuri SimCard ye kandi ngo ntabwo hazabaho kwibeshya ngo hazemo ibyo kugarura amafaranga, hazaba hari n’izindi serivise nka MTN Mobile Money.
Yagize ati “Kwibeshya, Oya! MTN izaba ifite abakozi bayo bazaba babishinzwe kugira ngo ibyabaye ubushize bitazongera kubaho ukundi. N’abishyura Cash bazaba bahari ariko MTN izaba ibihagazemo neza hamwe na MTN Tap & Pay.”
Daddy SADIKI RUBANGURA
UM– USEKE.RW
English