Nyuma y’ukwezi n’igice yaravunitse Abdul Rwatubyaye yatangiye imyitozo

Myugariro wa Rayon sports n’ikipe y’igihugu Amavubi Abdul Rwatubyaye wavunitse tariki 22 Werurwe 2017 yongeye gutangira imyitozo kandi yiteguye gukoreshwa mu mikino itaha y’ikipe ye.

Kuri uyu wa mbere tariki 8 Gicurasi 2017 nibwo Rayon sports yishimiye kugaruka mu kibuga kuri Abdul Rwatubyaye wari umaze ukwezi n’igice adakora ku mupira kubera imvune yo mu ivi.

Uyu musore w’imyaka 21 yavunikiye mu mukino Rayon sports yatsinzemo Bugesera FC i Nyamata muri Werurwe. Rwatubyaye avuga ko ikibuga kibi aricyo cyatumye agira imvune yo mu ivi.

“Nakandagiye nabi kuko twakiniraga ku kibuga kibi. Imvune yo mu ivi iba ari iyo kwitondera mu mupira w’amaguru niyo mpamvu nanze gukomeza akazi kandi ndwaye. Abaganga banyitayeho ubu nakize neza natangiye imyitozo ndi gushaka uko nagarura imbaraga nkakina imikino itaha.”

Rwatubyaye Rayon sports yakuye muri APR FC yakomeje avuga ko yifuza gukina imikino myinshi y’igikombe cy’Amahoro kuko atakinnye cyane muri shampiyona ikipe ye ifite amahirwe yo kwegukana.

Kuri uyu wa gatatu tariki 10 Gicurasi 2017 nibwo Rayon sports isura Musanze FC kuri stade Ubworoherane muri 1/8 cy’igikombe cy’Amahoro, umukino Abdul Rwatubyaye ashobora gutangira ku ntebe y’abasimbura.

Roben NGABO

UM– USEKE