Nyuma ya ‘Bye Bye Nyakatsi’ haje ‘Bye Bye Agatadowa’ itangirana na 2016

Minisitiri w’ibikorwa remezo James Musoni yatangaje ko muri Mutarama 2016 Leta y’u Rwanda izatangiza gahunda yitwa ‘Bye Bye Agatadowa’, iyi ngo izaba iha abaturage bagicana agatadowa amatara akoresha imirasire y’izuba mu gihe bataragerwaho n’amashanyarazi.

Minisitiri Musoni yatangaje ibi mu nama y’iminsi ibiri ikoranyije impuguke z’ahatandukanye muri Africa ziri kungurana ibitekerezo ku byatuma ikibazo cy’ingufu z’amashanyarazi zihagije ziboneka, ni mu nama yiswe iPAD (Infranstructure Partnerships for African Development).

Amatara bita itadowa akoreshwa n’ingo nyinshi mu byaro mu Rwanda, yifashisha igitambaro na Petrol mu kumurikira ingo nyinshi nijoro. Usibye kuba iyi petro ihenda ngo hari n’ibyago byo kuhavana indwara z’ubuhumekero kubera umwotsi w’itadowa.

Minisitiri James Musoni avuga ko gahunda ya ‘Bye Bye Agatadowa’ igamije guca utu dutara mu Rwanda ku bataragerwaho n’amashanyarazi bakaba bahawe amatara akoresha imirasire y’izuba.

Musoni ati “Campaign ya ‘Bye Bye Agatadowa’ izaha abataragerwaho n’amashanyarazi amatara akoresha ingufu z’izuba. Iyi gahunda izasiga buri rugo rwo mu Rwanda rukoresha itara ry’ingufu z’izuba aho gukoresha agatadowa.”

Minisitiri Musoni avuga ko ibi bizaba ari inyungu ku muryango wakoreshaga agatadowa kuko amatara bazahabwa atazajya abasaba kugura petrol kandi azajya abaha urumuri ruhagije, rushobora gufasha kunoza neza imirimo yo mu rugo, gufasha abana gusubiramo amasomo nimugoroba n’ibindi.

Leta y’U Rwanda isanganywe gahunda y’uko mu 2017 abanyarwanda 70% baba bamaze kugerwaho n’amashanyarazi.

Minisitiri Musoni yavuze ko iyi gahunda bazayigeraho  bakoresheje uburyo bwose butanga ingufu z’amashanyarazi. ‘Bye Bye Agatadowa’ izunganira izindi gahunda mu gufasha abanyarwanda bose kubona amashanyarazi kandi atabahenze.

‘Bye bye Agatadowa’ ije nyuma ya ‘Bye bye nyakatsi’ yasize nta nzu zisakaje ibyatsi zituwemo n’imiryango y’abantu.

Callixte NDUWAYO
UM– USEKE.RW