Nyaruguru : Abasangirangendo boroje abarokotse Jenoside inka 10, banatanga ‘Mituweli’ 1 300

Vénuste Kamanzi
05/21/2017

Mu bice binyuranye by’igihugu imiryango itishoboye yagabiwe inka ngo ibashe kwivana mu bukene

Nyaruguru – Kuri uyu wa gatandatu itsinda ry’Abasangirangendo b’abasiyisilamu bahuriye ku kuba barakoranye umutambagiro mutagatifu i Mecque mu 2011, baremaye abarokotse Jenoside batishoboye bo mu Murenge wa Rusenge baboroza inka 10, banishyurira Ubwisungane mu kwivuza “mutuelle de santé” abaturage 1 300 bo mu miryango itishoboye.

Inka 10 zahawe abatishoboye barokotse Jenoside yakorewe Abatutsi.

Muri iki gikorwa, Sheikh Bushokaninkindi Dawidi, Visi Perezida w’Abasangirangendo yavuze ko ari igikorwa ngaruka mwaka bakora kuva bafata umugambi wo gushyigikira Leta mu mu guteza imbere iterambere imibereho y’Abanyarwanda, igitekerezo bagize nyuma y’umutambagiro mutagatifu bagiyemo mu 2011.

Ati “Tumaze gukoramo ibikorwa utarondora, twahereye mu Mujyi wa Kigali, naho tujya muri gahunda ya Gir’inka na Mituweli, tujya mu Majyaruguru aho twubakiye abarokotse Jenoside yakorewe Abatutsi.

Mu Burasirazuba muri iyi minsi 100 tumaze kumurika inzu ebyiri z’abarokotse Jenoside mu Karere ka Kirehe, dufite n’amashuri y’icyitegererezo turimo kubaka mu Karere ka Kirehe agomba kwigisha ubumenyi rusange ariko adashyize ku ruhanda no kwigisha Korowani mu cyerekezo twihaye kandi bizakomeza.”

Sheikh Bushokaninkindi avuga ko ibi bikorwa batabigenera Abayisilamu bagenzi babo gusa, ahubwo ni ubufasha bagenera Abanyarwanda batishoboye muri rusange.

Ati “Ubutumwa dutanga ni ubwo gusaba Abanyarwanda twese tube bamwe dufatanyirize hamwe twunganire abandi bafatanyabikorwa mu cyerecyezo kimwe.”

Umunyamabanga wa Leta ushinzwe amashuri abanza n’ayisumbuye muri Minisiteri y’uburezi, akaba na Perezida w’aba Basangirangendo Isaac Munyakazi yavuze ko bafashe uyu mwanzuro mu rwego rwo gushyigikira gahunda ya Perezida wa Repuburika yo guharanira ko Umunyarwanda yabaho neza mu buryo bwose.

Umuyobozi w’Akarere ka Nyaruguru Habitegeko Francoins nawe wari uri muri iki gikorwa yavuze ko aba Basangirangendo bunganiye Leta, by’umwihariko Akarere ayobora mu buryo bwo gufasha abaturage bose kuzamukira rimwe bakagera ku iterambere, ndetse n’imibereho myiza.

Yagize ati “Dufite gahunda yo kuzamukira hamwe nk’abaturage bose ntihagire usigara inyuma , niyo mpamvu gahunda yose ishyigikira gahunda nziza za Leta natwe tuba tuyishyigikiye.”

Umwaka ushize warangiye akarere ka nyaruguru kari ku kigero cya 78,4% mu gutanga ubwisungane mu kwivuza , umwaka barangije mu kwezi kwa mbere bahita batangira ubukangurambaga bwa 2017/2018.Umuyobozi w’akarere ka Nyaruguru akavuga ko intego ari uko mu kwezi kwa gatandatu bazaba barangije gutanga ubwisungane mu kwivuza bwuwo mwaka.