Mu kiganiro n’abanyamakuru  cyabereye  mu Karere ka Nyanza, kuri uyu wa 18, Nyakanga, 2014, Umuyobozi w’aka karere  Murenzi Abdallah  yatangaje ko bagabanyije ubukene  muri uyu mwaka w’ingengo  y’imari irangiye ku kigero kingana na  14%.

Muri iki kiganiro  abanyamakuru  bifuje kumenya    umubare w’abaturage wavanywe mu bukene  ubikesheje  gahunda zitandukanye  akarere kagenera abaturage bo mu byiciro by’ubudehe.

Umuyobozi  w’Akarere  ka Nyanza,  Murenzi Abdallah  yavuze ko  muri uyu mwaka  ushize bahaye imirimo  abaturage bagera ku bihumbi 7   ari nayo mpamvu  yatumye  iki gipimo cy’imibereho myiza   kizamuka  kikagera kuri uru rugero rwa  14%.

Murenzi avuga ko  usibye gahunda z’ubudehe zizamura abaturage,  hiyongeraho  na gahunda ya Gir’inka. Muri ibi  bikorwa   imiryango  1051  yorojwe inka ku miryango 1020  yari iteganyijwe korozwa mu gihe cy’ umwaka wose.

Uyu muyobozi yemeza ko  muri uyu mwaka w’ingengo y’imari bifuza  kubikuba  nibura inshuro ebyeri.

Yagize ati:’’Twafashe ingamba ko buri mwaka tuzajya  dusuzuma   kugira ngo turebe  abaturage  biteje imbere ndetse n’abari mu cyiciro cya 3 n’icya  kane by’ubudehe baba barasubiye inyuma’’

Mukamana Espérance utuye mu Murenge wa Busasamana mu Karere ka Nyanza  yavuze ko yari amaze imyaka 3 ari mu cyiciro cya mbere cy’Ubudehe,  ariko ko yaje guhabwa akazi mu budehe  asaba inguzanyo muri Banki bituma  atera imbere, kuri ubu ngo  yishyurira umuryango we  ubwisungane mu kwivuza, n’abana be  akabishyurira amafaranga y’ishuri.

Imibare itangwa n’Akarere ka Nyanza  yerekana ko abaturage  49,1%  bari munsi y’umurongo w’ubukene, ubuyobozi bukavuga ko mu rwego rwo gukomeza  guteza imbere akarere hagiye gukorwa isuzuma riri ku gipimo kingana rishingiye ku  by’ibyiciro by’ubudehe  kugira ngo harebwe  intambwe  abaturage bamaze gutera  kuva  aho  izi gahunda zose zigiriyeho.

Aka Karere kahawe  na Leta   ingengo y’imari ingana na miliyari  11 izakoreshwa muri mwaka w’ingengo y’imari wa 2014 -­ 2015.

Muhizi Elysée

ububiko.umusekehost.com/Muhanga