Nyamagabe: Ubujura buravuza ubuhuha ngo kubera ubukene no kubura imirimo

Abaturage bo mu Mirenge inyuranye y’Akarere ka Nyamagabe barataka ko ubujura bukabije buhari muri iki gihe ku buryo ngo hari n’abamaze gufatirwa muri ubwo bujura bakicirwamo. Gusa, imibare bavuga ntihura n’iya Police.

Ubwo umunyamakuru w’Umuseke yasuraga Akarere ka Nyamagabe, abaturage banyuranye baganiriye kuri iki kibazo cy’ubujura bamubwiye ko buriho kandi muri iyi minsi bukabije, bakabihuza n’uko ngo imirimo yabaye micye ndetse hariho n’ubukene.

Nyirabahire Marie Louise, utuye mu  Murenge wa Gasaka yatubwiye ko hariho ubujura bukabije ngo abajura bariba imyaka, ariko n’inzu barazimena bakiba kandi ngo n’ibyo bibye biraburirwa irengero.

Ati “Abiba mu mirima biba ari inzara, ariko abaza mu nzu bakiba imyenda, ibikoresho byo munzu n’ibindi biba ari ingeso mbi ntabwo ari inzara,…Barakurikiranwa ariko ahanini ntabwo bafatwa.”

Undi muturage witwa Nteziryayo Gregoire, wo ku Gasanteri ko Kwitaba hegeranye n’umujyi wa Nyamagabe, asanga ngo ubujura buhari buterwa n’uko imirimo yabuze.

Ati “Umuntu wazindutse aje gushaka imirimo (ku gacentre) aba agomba kugira icyo atahana murugo, iyo bakibuze bishora mu bujura.”

Mukakabego Perepetuwa, we avuga ko ibisambo byabaye nk’icyorezo kuko ngo urateka n’ibyo kurya wagira aho ugana ugasanga barabitwaye, wagura itungo bugacya baryibye.

Ati “Hari ubukene ariko ibisambo nabyo biraturembeje, ubu nta kintu umuntu agikora ngo akibone ahanini ni nabyo byatuzambije, ibisambo rero sinzi ukuntu tuzabigenza. Inzego z’umutekano zaragerageje ariko byaratunaniye. Nk’ubu iwanjye bamaze kunyiba inka ebyiri zirahera.”

Sibomana Joseph utuye mu Murenge wa Cyanika, we yatubwiye ko kubera ko nta mirimo ihagije ku rubyiruko ihari, ngo biratuma bamwe biyahura mu bujura ndetse bamwe bikanabaviramo urupfu.

Ati “Hari ubwo umuntu ajya kwiba mu murima w’umuntu ugasanga bamwe babafatiyemo babiciyemo. Vuba aha, umuntu bamusanze mu murima yagiye kwiba kubera inzara bamutsinda mu murima.”

Abaturage bavuga ko bavuga ko mu Murenge wa Kibirizi hari umusore bafatiye mu murima w’ibijumba mu kabande baramukubita arinda apfa.

Nubwo badahuza amakuru neza, ngo mu mezi nk’abiri ashize haba hamaze gupfa abantu nka batatu bafatiwe mu bujura, harimo ngo n’umubyeyi bafashe yibye ibishyimbo.

Umuvugizi wa Police mu Ntara y’Amajyepfo, Chief Inspector of Police (CIP) André Hakizimana ahakana ko nta bantu batatu bapfuye mu mezi abiri ashize.

Yatubwiye ko hapfuye umuntu umwe, kandi nawe ngo yaguye kwa muganga nyuma yo gukubitwa, ntabwo yaguye mu murima aho yakubitiwe nk’uko abaturage babivuga.

Ati “Sinavuga ko muri Nyamagabe hari ubujura buruta ahandi muri iki gihugu, abanyabyaha bariho, kandi iyo turebye mu mibare Nyamagabe ntabwo ariyo iza ku isonga mu Ntara y’Amajyepfo ku bujura, izo ni sentiment z’abaturage baba bashaka kugaragaza ko ikibazo gikomeye cyane.”

CIP André Hakizimana akavuga guhangana n’ubu bujura, bisaba ko abayobozi bakomeza kwigisha abaturage bakabakangurira kwihangira imirimo, bagakura amaboko mu mifuka bagakora bakareka kwiba, kandi bakareka kugira umururumba w’iby’abandi.

Ngo, ubuyobozi bufatanyije n’inzego z’umutekano kandi bagomba gukomeza gukangurira abaturage kwirinda ibyaha kuko bifite ingaruka ku miryango yabo n’igihugu muri rusange.

Vénuste KAMANZI
UM– USEKE.RW