Nyagatare: Polisi n'abanyeshuri basibuye ibimenyetso byo mu muhanda

Kuri uyu wa Gatanu tariki 18 Nyakanga   mu Karere  ka Nyagatare, Umurenge wa  Rwimiyaga , Akagali ka Nyarupfubire  ku bufatanye bwa  Police n’ibigo by’amashuri bya New Life, Mary Hill Academy n’ abamotari, hasibuwe  imirongo yo mu muhanda yerekana  aho abanyamaguru bambukira hazwi nka  Zebra crossing.

Nyuma y’iki gikorwa  hakozwe inama. Muri iyi nama, abatabiriye kiriya gikorwa basobanuriwe akamaro ko gukoresha neza kiriya gice kihariye cy’umuhanda by’umwihariko ndetse n’amategeko agenga umuhanda muri rusange.

Inspector Emile Habumukiza  ushinzwe guhuza  abaturage na Polisi  ikorera muri ako karere yasabye abanyeshuri kujya birinda impanuka barushaho gukoresha neza umuhanda, bakitondera uko bambuka iriya mirongo y’umweru izwi ku izina rya Zebra Crossing.

Inspector Habumukiza yavuze ko igikorwa nk’iki cyo gukangurira abana b’abanyeshuri kumenya gukoresha neza umuhanda ari ngombwa kuko bifasha mu gukumira impanuka zo mu muhanda bakora bambukiranya umuhanda bajya cyangwa bava ku ishuri bikanabafasha gukura bazi neza amategeko y’umuhanda.

Yongeyeho ko iyi gahunda yo guhugura no kwigisha abanyeshuri ibyerekeranye n’amategeko y’umuhanda, izagera ku bigo byose by’amashuri byo muri ako karere.

Iyi gahunda ireba cyane cyane abamotari n’abandi bose batwara ibinyabiziga mu muhanda mu rwego rwo kubibutsa  ibyapa n’ibindi bimenyetso byo mu muhanda no  kwirinda umuvuduko ukabije hagamijwe kwirinda impanuka.

RNP

ububiko.umusekehost.com