Nubwo twishimira ibyagezweho mu kongera imirimo, haracyari ikibazo cy’Ubushomeri – PM Murekezi

*CESTRAR yo ivuga ko abakora mu bigo byingenga barenganira mu kajagari ko gutanga imishahara,
*Ngo leta ngo igomba gushyiraho politike y’imicungire y’abakozi itareba aba leta gusa,
*Uyu munsi ngo abashomeri mu mijyi bangana na 9% naho mu barangije ni kaminuza ni 14%.

Kuri uyu wa mbere mu kwizihiza umunsi mpuzamahanga ngaruka mwaka w’umurimo, Minisitiri w’intebe Anastase Murekezi yavuze ko nubwo hishimirwa ingamba Leta yashyizeho zo kongera imirimo kandi zikaba zaratanze umusaruro, ngo ntawakwirengagiza ko u Rwanda rutaragera aho rwifuza kuko rugifite Abashomeri, dore ko ubushomeri mu barangije kaminuza bugeze kuri 14%.

Ku rwego rw’igihugu, ibikorwa byo kwizihiza uyu munsi mpuzamahanga w’umurimo uba kuri iyi tariki 01 Gicurasi, byabereye mu gice cy’inganda “Special Economic Zone” mu Karere ka Gasabo, Umujyi wa Kigali.

Minisitiri  w’abakozi ba Leta n’umurimo Judith Uwizeye yatangaje ko ubu Abanyarwanda bagejeje igihe cyo gukora kandi babishoboye havuyemo abakiri mu mashuri ngo bagera kuri 5.590.000.

Muri bo, ngo 68% bakora imirimo y’ubuhinzi n’ubworozi, 32% bakora imirimo itari iy’ubuhinzi n’iyunganira iy’ubuhinzi, 10% bakora ubucuruzi butandukanye, 5% bagakora mu bwubatsi, 2% babagakora mu nganda, 2% bagakora mu gutwara abantu n’ibintu.

Minisitiri Uwizeye yavuze ko  mu gukomeza kunoza umurimo, ngo ubu itegeko rigenga umurimo ririmo kuvugururwa ku bufatanye bw’inzego zose bireba, kandi ngo na Politiki y’umurimo nayo irimo kuvugururwa.

Minisitiri kandi yavuze ko ivugururwa rya Politiki y’umurimo n’itegeko rigenga umurimo ngo bigamije guteza imbere umurimo ndetse no gukemura burundu ibibazo aho byagiye bigaragara.

Muri uyu muhango, Minisitiri w’intebe Anastase Murekezi yavuze ko hari byinshi byo gushimwa byagezweho mu guhanga imirimo mishya.

Yagize ati “Nubwo twishimira ko hari ingamba nyinshi nziza Leta yashyizeho zo guhanga imirimo mishya yiyongera ku mirimo iri mu gihugu. Ntitwakwirengagiza ko tutaragera aho dushaka, kuko imibare dufite ubungubu iratwereka ko mu mijyi igipimo cy’ubushomeri kiri ku 9%, kandi ku rubyiruko rurangije za Kaminuza igipimo cy’ubushomeri kikaba kiri kuri 14%.”

Minisitiri w’intebe yakomeje avuga ko umuti w’iki kibazo ukomeje gushakwa cyane cyane hashyirwa imbaraga mu kwigisha ubumenyi n’ubumenyingiro mu mashuri, no guhugura abarangije amashuri mu by’ubumenyingiro.

Murekezi yanaboneyeho gusaba abakoresha, baba abo mu nzego za Leta n’izikorera kwakira urubyiruko rwinshi rujya mu kwimenyereza (internship).

Abakozi mu nzego zinyuranye baracyafite ibibazo byinshi

Kuri ubu abikorera nibo bagira uruhare runini cyane mu gutanga imirimo, byibura 98% by’abakozi mu Rwanda bari mu rwego rw’abikorera n’imiryango itegamiye kuri Leta nk’uko byatangajwe n’Urugaga rw’abikorera.

Urugaga rw’Amasendika y’abakozi (CESTRAR) rwavuze ko nubwo Leta ishishikariza abantu kwihangira imirimo kandi itanga akazi ku Banyarwanda benshi, ngo kuba nta tegeko rigena umushahara fatizo ahatari mu bigo bya Leta ngo abakozi bamwe baraharenganira.

Muberwa Martin, umuyobozi w’urugaga rw’Amasendika yashimye ko mu micungire y’abakozi ba Leta n’izindi nzego zihembwa na Leta hashyizweho imirongo migari izakurikizwa mu kuringaniza imishahara.

Agira ati “Iki ngiki kirabura mu bakora mu bigo by’abikorera n’ibindi bigo bitari ibya Leta za ONG. Haracyabura Politiki y’imishahara, bigaragara ko imishahara itangwa mu buryo bw’akajagari bigatuma akenshi abakozi bakora muri ibyo bigo barengana.”

Yongeraho ati “Kuyishyiraho byatuma hagenwa imishara ku buryo bunoze kandi bigendanye n’ibiciro biriho ku isoko.”

Muberwa yasabye kandi ko amafaranga ahabwa abari mu zabukuru (Pansion) yakongerwa bakajya bahabwa amafaranga ajyanye nuko ibiciro kw’isoko bihagaze kandi bidashenye ikigo cy’ubwiteganirize bw’abakozi.

Umunsi mpuzamahanga w’umurimo wizihiza buri tariki ya mbere Gicurasi , muri uyu mwaka wa 2017 u Rwanda rwawizihije ku nsanganyamatsiko igira iti “Duteze imbere umurimo dusigasire ibyagezweho dukesha imiyoborere myiza isoko y’iterambere rya buri wese.”

Callixte NDUWAYO
UM– USEKE.RW