“Nta mpamvu yo gukomeza kwitegeza urupfu”– Min. Mukantabana

Minisitiri ufite ibiza no gucyura impunzi mu nshingano ze,  Mukantabana Seraphine, kuri uyu wa kabiri tariki 4 Gashyantare 2014 ubwo yari mu nama nyunguranabitekerezo ku  kiganiro kijyanye n’imicungire y’ibiza mu Nteko ishinga Amategeko yavuze ko abantu batuye ahateye inkeke bakwiye kwimuka nk’uko bakomeje kubisabwa aho gukomeza kwitegeza urupfu kubera amafaranga y’ingurane.

Minisitiri Mukantabana avuga ko abantu  batuye mu manegeka bakomeje kubwirwa kwimuka inshuro nyinshi ariko bamwe bakinangira bavuga ko Leta itigeze ibaha amafaranga y’ingurane kugira ngo bashake aho bimukira.

Agira ati “Urupfu ntimujya inama, icy’ingenzi si amafaranga, kuko ikiza kimuhitanye atabona uko yishyuza yapfuye.”

Arongera ati “Turabakangurira kureka gukomeza kwitegeza urupfu bakimuka, bakumva uburemere bw’ikibazo kandi bakamenya ko ikigamijwe ari ukubungabunga ubuzima bwabo bukava mu kaga aho kwirirwa bahanganye na Leta.”

Icyakora ariko kuri iki kibazo Nsengiyumva Jean Baptiste, umuyobozi w’ishami rishinzwe ubushakashatsi no kumenyekanisha Ibiza muri MIDIMAR yavuze ko kwimura aba bantu byasabaga amafaranga ariko akaba atarabonetse.

Avuga ko amafaranga amaze kubura hafashwe ingamba zo kububakira binyuze mu miganda  rusange n’ubwo ngo nyuma haje no kuvuka ikibazo cy’ibibanza. Agira ati “Iki kiracyari ikibazo kuko usanga n’ibibanza bitaboneka.”

Nsengiyumva yakomeje avuga ko batangiye kureba ibindi bisubizo bitari ukwimura abantu, aho ngo nk’Umujyi wa Kigali  urangwamo inzu ziri mu manegeka nyinshi wafashe gahunda yo gusubira inyuma ukajya kongera kureba niba koko abatuye bene aho hantu  bose bakwiye kwimurwa.

Agira ati “Mu gukumira Ibiza kwimura abantu si cyo gisubizo cyonyine  ahubwo ushobora no gutunganya aho batuye.”

Minisiteri y’imicungire y’ibiza no gucyura impunzi kandi  iratangaza ko ishishikajwe no gukumira Ibiza mbere y’uko biba ngo kuko ubushakashatsi bwagaragaje ko ifaranga rimwe rikoreshwa mu gukumira ibiza riba rirengeye amafaranga 100 akoreshwa mu gusana ibyangijwe n’ibiza.

Minisitiri Mukantabana yatangaje ko Minisiteri ayoboye ishyize imbere gahunda yo gukumira ibiza bitaraba aho yavuze ko bakangurira abaturage kubahiriza amabwiriza atandukanye arebana no gukumira ibiza.

Agira ati “Ni ukwitegura mbere y’uko ibiza biba hagira n’icyiba tukamenya uko tubyitwaramo, mbese ni ukwitegura hakiri kare.”

Uyu muyobozi  avuga ko kuri ubu gukumira ibiza byabaye ibikorwa bya buri wese uhereye kuri Minisiteri zitandukanye  kugera ku Kagari no ku muntu ku giti cye. Agira ati “EDPRSII ivuga ko gukumira ibiza ari igikorwa nkomatanyanzego.”

Aho kugabanuka biriyongera

Akomeza avuga ko muri MIDIMAR bafite gahunda yo kumenyekanisha ibiza buri munsi bifashishije ubutumwa bugufi hagamijwe kubifatira ingamba bitarakabya.

Icyakora ariko Minisiteri Mukantabana avuga ko n’ubwo Minisiteri y’ibiza ifatanyije n’izindi nzego bashyize ingufu mu guhangana n’ibiza ngo kugeza ubu imibare igaragaza ko aho kugabanuka bikomeza kwiyongera.

Agira ati “Mu by’ukuri naba mbeshye mvuze ko ibiza birimo kugabanuka.”

Avuga ko impamvu nyamukuru yaba ituma ibiza bikomeza kwiyongera ari imihindagurikire y’ikirere aho yatanze urugero avuga ko mu Karere ka Huye haherutse kugwa imvura idasanzwe yarimo  urubura rwinshi.

MIDIMAR yashyize ahagaragara ubwoko bw’ibiza bikunze kwibasira Akarere k’Afurika y’Iburasirazuba, bimwe muri byo harimo amapfa, imyuzure, inkangu, inkuba, kwangirika kw’ibidukikije, inkongi z’umuriro, isenyuka ry’amazu n’ibindi.

Rachel Mukandayisenga
ububiko.umusekehost.com