No more beef: Bebe Cool na Chameleone basangiye i Kigali

Inshuro nyinshi cyane bumvikanye baterana hejuru ndetse bigeze kumara umwaka ntawurebana n’undi nubwo babaga mu mujyi umwe. Gusa kuva mu mwaka ushize aba bagabo batangiye kujya bavuga rumwe. Ahagana saa munani z’amanywa kuri uyu wa gatanu bombi basangiye ifunguro muri Hotel i Kigali, baseka basabana.

Mu mpera z’umwaka ushize bagaragaye mu gitaramo kimwe cyari cyateguwe na Bebe Cool, nubwo byari byavuzwe ko ari buze nta muntu n’umwe wemeraga ko Chameleone ari buze kukigaragaramo.

Iyi week end bombi bari i Kigali, baje mu bitaramo binyuranye, umwe azaririmba ukwe undi ukwe.

‘Beef’ yabo yahereye mu ntangiriro z’umwaka wa 2000 ubwo bose bariho bazamuka.

Bebe Cool yifatanyije na Bobi Wine (ubu ni abanzi) bahimba indirimbo bise ‘Funtula’ yarasaga kuri Chameleone bavuga ko atagira isoni kuba umusore nkawe yarakundanaga n’umugore ushaje (Dorotia) kubera ifaranga.

Chameleone yabasubije mu ndirimbo yose ‘Nekolera Mali’ yabiciye cyane bigacika muri aka karere. Ndetse iyi ayikurikiza iyo yise ‘Dorotia’ y’uyu muzungukazi we ngo wari mukuru cyane kuri we.

Beef yabo yakomereje mu kwerekana uwazamutse kurusha undi mu gafaranga. Bebe Cool yagura Hummer, Chameleone akagura Cadillac Escalade bityo bityo.

Gusa umubano wabo waje kuzahuka ubwo boombi bahuriraga mu ndirimbo yasubiwemo ya Bebe Cool yitwa Bogolako.

Muri iki gihe gito gishize abakunzi ba muzika muri Uganda bakomeje gukurikiranira hafi imibanire ya bombi bagikekamo igitotsi.

Kuri uyu wa gatanu bakaba basangiye ifunguro i Kigali, bagaragaye baseka, baganira ku tuntu tworoheje.

Ubushyamirane bw’aba bagabo bwamaze imyaka igera kuri 15 gusa bwatumye bamenyekana cyane binabateza imbere ku buryo hari abakeka ko ari ba ‘BIGIRANKANA’ (babikoze babigambiriye).

Photos/P Muzogeye/UM– USEKE.RW

Plaisir MUZOGEYE
UM– USEKE.RW