Nirere Gentille arasobanura umwambaro we w’umunsi

*Umuseke ugiye kujya ubahitiramo umwambaro w’umunsi.

Kuri uyu wa gatatu, twahisemo uko Nirere Gentille ni umunyeshuri muri kaminuza yu Rwanda ishami ry’ubushabitsi n’icungamutungo “University of Rwanda College of Business and Economics (CBE)” yari yambaye.

Nirere wanabaye igisonga cya kabiri cya miss CBE 2016, aganira n’Umuseke yagarutse ku cyamuteye kwambara ipantalo ya  jeans y’ubururu, umupira n’inkweto bya chocolat.

Ngo yahisemo kwambara gutya kuko akunda jeans. Ati “Ni umwenda ugaragara neza, kandi ushobora kuwujyana ahantu hatandukanye haba  ku ishuli, ku kazi ndetse no muri gahunda zitandukanye z’umunsi.”

Nirere avuga ko yahisemo kwambara inkweto ndende kuko azikunda kandi zikaba zijyanye n’uburyo yari yambaye, akavuga ko inkweto ndende wazambara ugiye ahantu hatandukanye ndetse ukaba wanazambarira ku myenda itandukanye, yaba ipantalo, ikanzu , ndetse n’indi yose yajyana n’izo nkweto.

Nirere ngo kwambara ntabwo ari ibintu ahubukira, kuko ngo bimufata umwanya abitekerezaho, yibaza icyo aribwwambare bitewe n’aho agiye.

Ati “Ubundi akenshi mu ijoro, mbere yo kuryama ndabanza ngahitamo imyambaro ijyanye na gahunda nzakora ku munsi ukurikiyeho.”

Nirere Gentille avuga kwambara neza bidasaba kwambara ibihenze gusa, ahubwo ngo kudahubuka, kumenya imyenda ijyanye n’imiterere y’umuntu ndetse no kwambara neza bihuye n’aho ugiye niryo banga ryo kwambara neza.

Photo© Evode Mugunga
Robert Kayihura/Umuseke