Ikihishe inyuma y’ihagarikwa rya Eric

Kuri uyu wa gatatu nibwo mu ikipe ya APR FC, binyuze mu munyabanga w’iyi kipe Kalisa Adolphe, bazindute batangaza ko umutoza Eric Nshimiyimana wari wungirije Brandt muri iyo kipe ngo abaye ahagaritswe byagateganyo mu gihe hagikorwa iperereza ry’amarozi amuvugwaho ngo yaba yarakoreye mu gihugu cy’u Burundi ubwo ikipe y’igihugu Amavubi yiteguraga gukina n’Intamba ku Rugamba.

Nyuma yiryo hagarikwa rero ryatunguye benshi, henshi hakaba haragiye hibazwa icyaba cyateye ibyo dore ko ibyo umutoza Eric ashinjwa bivugwa ko yabikoreye mu ikipe y’igihugu bikaba bitumvikana ukuntu ikipe ya APR FC, ariyo yahita ifata iya mbere mu kumuhagarika cyane cyane iki kibazo cy’amarozi atari ubwa mbere kivugwa mu mupira w’amaguru, aho ndetse abatoza nka Andy Mfutila na Jean Marie NTAGWABIRA bose baciye mu ikipe ya APR  bari muri bamwe bagiye bakunda gushinjwa n’abakunzi ba Ruhago kwifashisha amarozi hakaba hibazwa rero impamvu ki umutoza Eric ariwe utangiriweho iperereza cyangwa se ni politiki nshya?

Mu kiganiro Kalisa Adolphe yahaye Umuseke.com, yavuze ko ikipe ya APR mu mategeko ayigenga itakwihanganira umuntu ufite imyitwarire nk’iyo kuko ngo bitaba bihesha isura nziza iyi kipe. Gusa akaba yavuze ko hagikorwa iperereza kuribyo birego basanga bimuhama agasezererwa burundu basanga kandi ari umnwere agasubizwa mu mirimo ye.

Tumubajije impamvu ki se bataretse ikipe y’igihugu ngo abe ariyo imukurikirana dore ko ari nayo yari imufite mu nshingano icyo gihe atubwira ko ikipe y’igihugu ikora ibyayo na APR igakora ibyayo. Twashatse kumenya rero icyo umutoza Eric avuga kuri iryo hagarikwa mu kiganiro twagiranye avuga ko nawe yabibonye nk’abandi gusa ko byamubabaje kumva ko abantu bashaka kumwirukana aho kubikora neza bagashaka kumuharabika bamwicira izina.  Ati “ haba mu ikipe ndetse no mu nshuti zanjye za hafi bazi uburyo nkunda kuzana abantu tugasengera ikipe, sinumva rero ukuntu naca inyuma nkajya mu marozi ndumva naba nibeshya ndetse nabeshya Imana”.

Eric yakomeje avuga ko Atari ubwa mbere mu ikipe ya APR bashaka kumuhimbira ibintu nk’ibyo ngo dore ko no mu bihe byashize ubwo ikipe ya APR yakinaga n’ikipe yo muri Angola atavuze izina nabwo bavuze ko yari yazanye amarozi aha akaba yari kumwe n’umutoza Muvala  Valens.

Eric asoza avuga ko yizeye ko Imana izamurenganura gusa ko azakora ibishoboka byose ngo izina rye rigarurirwe icyizere gusa akaba ngo akunda sport ndetse n’ikipe ya APR by’umwihariko nk’umuntu wayibayemo igihe kirekire dore ko ubu yanayitozaga atarongererwa amasezerano nyuma yaho ayo bari bafitanye arangiriye mu kwezi kwa mbere k’uyu mwaka.

Ku rundi ruhande mu ishyirahamwe ry’umupira w’amaguru mu Rwanda FERWAFA nkuko aribo iki kibazo kireba bwa mbere, twagerageje kubabaza uruhande bariho maze umunyabanga w’iri shyirahamwe Jules Kalisa adutangariza ko iby’ihagarikwa rya Eric twabibaza abamuhagaritse aribo APR ko kuri bo kugeza ubu nta kibazo bafitanye na we ko nandetse akiri umwe mu batoza babiri bungirije umunya Ghanna SELLAS Tetteh.

Jado DUKUZE
Umuseke.com