Ngoma: Umugabo umaze imyaka 7 aba munsi y’igiti yabonewe icumbi

*Ubuzima bwo kurara mu nzu ngo butandukanye cyane n’ubwo kurara hanze,
*Gusa ngo indangamuntu ye ifungiraniye mu kagari arasha ko bayimuha.

Nyuma y’inkuru duherutse kubagezaho ivuga ku muturage wo mu murenge wa Mugesera, mu  karere ka Ngoma witwa Ntezimihigo Erneste wari umaze imyaka irindwi aba munsi y’igiti cy’avoka, ubuyobozi bwamaze kumushakira aho aba acumbikiwe mu gihe bagitegereje kumwubakira, uyu muturage arashimira cyane ubuyobozi ngo ubuzima yabagamo hanze butandukanye cyane n’ubwo yatangiye kubamo aho ari mu nzu.

Umuseke umenye ko yacumbikiwe wongeye kumusura, aho yemeza iminsi micye amaze munzu itandukanye cyane no kuba munsi y’igiti aho yari amaze imyaka irindwi, ngo kurara mu nzu ntako bisa, akavuga ko ashimira Perezida Paul Kagame wita ku mibereho y’abatishoboye.

Ntezimihigo Erneste yari amaze imyaka irindwi aba munsi y’igiti cy’avoka mu mudugudu wa Munini, akagari ka Mugatare, umurenge wa Mugesera. Ubu ubuyobozi bw’Umurenge wa Mugesera bwamaze kumushakira aho aba acumbikiwe nk’uko bwari bwabwijeje mu nkuru y’ubushize.

Mu gihe hagishakishwa uko Ntezimihigo yubakirwa inzu ye bwite, yacumbikiwe mu nzu isakaye y’icyumba kimwe, aha ntanyagirwa ntanicwa n’imbeho cyangwa ngo arare arwana n’imibu.

Ntezimihigo agira ati “Ubu uko meze ndumva biraho nta mibu ikindya, nta mbeho, nta n’imvura izanyagira ndishimye mu majoro abiri mparaye ndumva ari byiza.”

Ntezimihigo ati “Ndashimira cyane Perezida Kagame. Ndamushimira ko yashyizeho ubuyobozi bureba imibereho y’abantu kuko kugeza ubu meze neza rwose.”

Aha acumbitse ni aho yakodesherejwe, ndetse ngo yishimira ko hari abaturanyi bashobora kuganira nawe ntabe mu bwigunge nka mbere munsi y’igiti.

Nubwo Ntezimihigo Erneste yabonye aho aba akinze umusaya, nta bwisungane mu kwivuza (mituweri) arabona, n’indangamuntu ye ngo iba mu biro by’agari kandi yabuze amafaranga yo kuyishyura.

Mu bimuhangayikishije kandi ngo ntajya abasha gutora abayobozi by’umwihariko n’amatora y’Umukuru w’Igihugu.

Elia BYUK– USENGE
UM– USEKE.RW