Na “MTN Damarara” buri wese afite amahirwe yo kuzatsindira imodoka ya TOYOTA PRADO

*Abakiliya bazatsindira ibihembo birimo amafaranga, televiziyo, telefoni, moto, imodoka n’ibindi.

Kuri uyu wa gatatu MTN Rwanda yatangije Promosiyo yo gushimira abakiliya bayo yise “MTN Damarara” izamara amezi atatu. Guhamagara, kohereza ubutumwa bugufi (SMS) no gukoresha Internet ya MTN bizajya biha umukiliya amahirwe yo gutsindira amafaranga, telefone, televiziyo, amafaranga yo guhamagaza (airtime) cyangwa igikoresho kifashishwa mu gushyira umuriro muri telefoni (power banker) buri cyumweru, moto imwe izajya itangwa buri kwezi aho imodoka izatsindirwa kuri finale.

Iyi promosiyo ngo si irushanwa nk’uko izindi zabaga zimeze aho umuntu yahatanaga no kohereza SMS nyinshi cyangwa gushyiramo amafaranga menshi kugira ngo yongere amahirwe yo gutsinda.

MTN Damarara yo igisabwa ni ugukoresha SIM Card ya MTN uhamagara, wohereza SMS unakoresha Internet gusa nk’uko umuntu asanzwe ayikoresha.

Yvonne Manzi Makolo ushinzwe kumenyekanisha ibikorwa muri MTN yavuze ko “MTN Damarara” atari ipiganwa ahubwo ari uburyo bwo gushimira abakiliya, ngo ntabwo ari ngombwa ko abantu bagurisha utwabo kugira ngo bashore muri iyi promosiyo.

Ati: “Kuri iyi promosiyo icyo itandukaniyeho n’izindi ntabwo ari ipiganwa abantu bavuga ngo ninohereza SMS nyinshi nibwo nzatsinda. Icyizaha umukiliya amahirwe yo gutsinda ni uko azakomeza agakoresha MTN uko asanzwe ayikoresha. Ahamagara, yohereza SMS cyangwa akoresha Internet.”

Iyi promosiyo kandi ngo ntabwo ari iy’abayobozi b’ibigo, abacuruzi n’abandi bakoresha telefone cyane, ahubwo ngo na wa wundi ukoresha Frw 100 yonyine afite amahirwe angana n’ay’ukoresha amafaranga menshi kuri telefone akora akazi.

Ngo bategura iyi promosoyo bagiye bashyiriraho abakiliya intego bitewe n’uko basanzwe bakoresha MTN.

Yavuze ko abasanzwe bakoresha amafaranga make bafite intego yabo ndetse n’abakoresha menshi bakagira iyabo ntego ariko bose bakagira amahirwe angana yo gutsindira ibihembo.

Ati: “Uburyo twakoze iyi promosiyo buri wese twamuhaye intego ageraho, niba usanzwe ukoresha amafaranga menshi runaka, intego yawe iri hejuru. Buri wese mu rwego rwe dufite intego twamuhaye nayigezaho akabona amanota aratsindira ibihembo nk’uko n’usanzwe akoresha make na we intego twamushyiriyeho nayigezaho ari butsindire ibihembo.”

Iyi promosiyo izamara amazi atatu aho buri cyumweru hazajya hatangwa ibihemo birimo amafaranga, Televiziyo, telefone (Smart Phone), amakarita yo guhamagara na Power Banker.

Buri kwezi hazatangwa ipikipiki (moto) ndetse n’imodoka yo mu bwoko bwa Toyota Land Cruiser Prado izatangwa kuri finale hasize amezi atatu.

“MTN Damarara” uwemerewe kuyikina ni umufatabuguzi umaze amezi atatu akoresha umurongo wa MTN kandi ngo umuntu azajya areba amanota amaze kugira akanda *131#. Nimero izajya ihamagara uwatsindiye ibihembo ni 07 84 000 000.

Muri iyi promosiyo MTN izatanga ibihembo bifite agaciro ka Frw 135 000 000 mu gihe cy’amezi atatu izamara. MTN Rwanda kuri ubu ifite abafatabuguzi basaga miliyoni enye hano mu Rwanda.

Callixte NDUWAYO
UM– USEKE.RW