Mwulire: Hashize imyaka hafi 3 batemerewe kugira icyo bakora mu byabo bategereje ingurane

*Kwimurwa babimenyeshejwe muri Werurwe 2013; muri Mata batangira kubarirwa
*Aho babariwe ngo bimurwe hazubakwa ikigo cya gisirikare
*Metero Kare imwe bayibariwe kuri 250Fwr;
*Abatarishyurwa ngo basaga 150, amarira ni yose…
*Barataka inzara n’ubukene; bamwe inzu zishobora kubagwira kuko batemerewe gusana

Rwamgana – Abaturage bo mu midugudu itatu yo mu murenge wa Mwurire batarishyurwa ingurane y’imitungo y’ahazubakwa ikigo cya gisirikare aho bavuga ko imyaka igiye kuba itatu babayeho nk’abacumbikiwe mu byahoze ari ibyabo kuko bambuwe uburenganzira bwo kugira icyo bakorera muri ubu butaka uretse kuharyama gusa.

Aba baturage basaga 150 biganje mu mudugudu wa Rebero bavuga ko tariki 25 Werurwe 2015 Minisiteri y’ingabo yabwiye ko bagomba kwimurwa nyuma y’iminsi 15 ku itariki 09 Mata 2013 bahise batangira kubarirwa agaciro k’imitungo yabo.

Bavuga ko bakimara kubarirwa babujijwe kongera guhinga imirima yabo ibintu byarenza amezi atatu cyangwa gusana amazu yabo nk’uko itegeko rugena ibyo kwimura abantu no kubaha ingurane ribigena.

Nubwo ngo byakozwe vuba, batangazwa n’uburyo nyuma y’imyaka ibiri, mu kwezi kwa karindwi 2015 ari bwo batangiye kwishyura bamwe mu babariwe. Ku giciro babariweho icyo gihe.

Mu kwa karindwi uyu mwaka, aba baturage babwiye Umuseke ko babwiwe ko amafaranga yageze kuri Konti zabo, maze ngo bagezeyo bamwe basanga ntayariho abandi ariho.

Domitilla Mukabyenda umwe mu batarahawe ingurane ati “…urabona ko turi mu bihuru, nta kintu na kimwe twongeye gukora; amazu ari asenyuka; amenshi yaraguye; nta guhinga kandi ari byo benshi byari bidutunze, baratuvanze mu mutwe nta kintu na kimwe turi gukora, bamwe abana bavuye mu mashuri.”

Uyu muturage akomeza agira ati “kugeza ubu twumva tudakeneye amafaranga cyane kurusha uko dukeneye uburenganzira ku butaka bwacu.”

Ugeze muri aka gace usanga amatongo y’abagiye bishyurwa bakimuka naho abatarishyurwa bakikijwe n’ibisambu n’amazu yabo usanga yenda kubagwaho kuko babujijwe kuyasana.

Odetta Nyirabakiga utuye mu mudugudu wa Rebero agira ati “mfite umwana; icyo gihe yarigaga, nahingaga utwumbati nkabasha kubona uko mwishyurira ariko ubu ntibakwemera ko uhinga, umwana yarahagaritse ishuri.”

Kutemererwa kugira icyo bakora muri ubu butaka; aba baturage bavuga ko byatumye bagenda bagurisha utwabo nk’amabati; inzugi kugira ngo babashe kubona nibura ikibatunga.

Gahunda “Les pourcent “ irabata mu gihombo ku buryo ngo nibanishyurwa ntacyo bizabamarira

Aba baturage basigaye batarishyurwa bavuga ko muri aka gace hadutse gahunda bise “les pourcent” aho umuturage wifite aguriza mugenzi we akamusezeranya kuzamwungukira inyungu runaka ku mafaranga yamugurije nibura kugira ngo abashe kubaho.

Hategekimana Gaspard ati “uwari ufite agatungo nk’inka cyangwa ingurube yaragurishije, nyuma haba hajeho les pourcent, umuntu yakuguriza ibihumbi 100 ukazamwishyura ibihumbi 200,ku buryo n’ayo twabariwe atakirimo. Ibyo ni ibibazo Leta yaduteje.”

Ba rusahurira mu nduru babonye icyuho

Aba baturage bari basanzwe bahinga urutoki bavuga ko hari ba rusahurira mu nduru bitwaza ko iyi mitungo yagiye mu biganza bya MINADEF bityo ko nta muturage uyifiteho ijambo.

Hategekimana akomeza agira ati “…mu rutoki akeraga umuntu yarazaga akagatema ati ‘aha si mu kwawe ni mu kwa MINADEF.’ Uku ni ukunyicisha inzara jye n’umuryango wajye.”

Benshi muri aba baturage baganiriye n’Umuseke basaba ko mu gihe uyu mwaka washira batishyuwe nibura basubizwa uburenganzira ku butaka bwabo bagahinga kugira basubirane ubuzima.

Uko bwije uko bukeye ubuzima bukomeza guhenda, igiciro ku isoko kirazamuka. Kuba barabariwe muri 2013, aba baturage bavuga ko igiciro babariweho kitakijyanye n’ubuzima bwa none.

Umuturage utifuje ko umwirondoro we umenyekana; yagize ati “ hashize imyaka ibiri n’igice, niba muri icyo gihe umufuka wa ciment waraguraga 7 500; ikibanza cyaraguraga miliyoni imwe uyu munsi byose byarazamutse; …njye ndabasaba kuzansubiriramo niba batabikoze ngumane uburenganzira ku mutungo wanjye.”
Ubuyobozi bw’ibanze buratanga icyizere

Bitandukanye n’ibyo abaturage bavuga (ko bafite ibyangombwa by’ubutaka ndetse ko babitanze) Theogene Ndacumura uyobora umudugudu wa Rebero (wiganjemo benshi batarishyurwa) avuga ko aba batuarage batarishyurwa barimo abatari baratanze ibyangombwa bya burundu; n’abari bibeshye kuri numero za konti.

Uyu muyobozi avuga ko n’ubwo ibi bibazo byaba byarabayeho bitari bikwiye gufata igihe nk’igishize kugira ngo bikemurwe.

Jackson Kinyamahanga Uyobora umurenge wa Mwurire avuga ko ibibazo byatumaga aba baturage batishyurwa biri kuvugutirwa umuti.

Kinyamahanga ati “ yego byaratinze ariko icyo nzi cyo ni uko dosiye zabo ziri gutunganywa kugira ngo na bo babashe kwishyurwa, mu minsi micye baraba bishyurwa.”

Photos/M.Niyonkuru/UM– USEKE

Martin NIYONKURU
UM– USEKE.RW