"Bakobwa mwirinde inda zitateguwe niba mushaka ejo hazaza heza" Bizimana

Mu muhango wo guhererekanya ububasha hagati ya Komite icyuye igihe y’umuryango AERG  y’ishami rya Kaminuza y’u Rwanda ryigisha uburezi wabaye kuri uyu wa Gatandatu, umuyobozi ukuriye abanyeshuri bahiga Jean Baptiste Bizimana yasabye abanyeshuri b’abakobwa bo muri uyu muryango kwirinda inda zitateguwe bita iz’indaro niba bashaka kugira ejo heza.

Bizimana Jean Baptiste wari uhagarariye umuyobozi mukuru w’iri shuri yashimye ubufatanye bwaranze abashoje ikivi  n’ubuyobozi bw’ikigo ariko asaba ababasimbuye ko bagomba kungera ingufu mu guhugura no kuganiriza abagize uriya muryango cyane cyane abakobwa ku buryo bakwirinda ibibazo bwaterwa n’ubwomanzi.

Yagize ati ” Nk’uko intero ya AERG ari uguharanira ejo heza, birakwiye ko abakobwa ba AERG bakwirinda inda zitateguwe niba koko bashaka kubaho mu buryo buhuje n’iyo ntero.”

Abafashe ijambo bagarutse ku bikorwa byiza byiza byaranze Komite icyuye igihe harimo igikorwa cyo gushyira inka mu rwuri rwagenewe za AERG ruri i Nyagatare ndetse no kwita ku banyamuryango mu buryo butandukanye.

Theoneste Hagenimana ukuriye Komite icyuye igihe yasabye abamusimbuye kusa ikivi cy’aba babanjirije mu ryo ryo kugera ku ntego yo kubaho neza kw’abanyamuryango ba AERG CE ( AERG-College of Education)

Umuyobozi mushya wa AERG CE Mirindi Jean de Dieu yagarutse ku biteganyijwe gukorwa muri gahunda za Komite nshya. Mujri zao harimo kubika neza ubuhamwa bwanditswe n’abanyeshuri bigaga muri AERG KIE.

Mirindi yongeyeho ko muri gahunda zabo harimo no kungera umubare w’inka bafite muru rwa rwuri zikaba ebyiri cyangwa eshatu.

Nyuma y’ijambo ryatanzwe na Bizimana Jean Damascene, hakurikiyeho ijambo ry’umushyitsi mukuru, Uwamaliya Media wari uhagarariye FARG.

Uyu muyobozi yashimangiye ko kwiga k’umunyeshuri agatsinda ariryo banga rwo kugira icyo ageraho.

Ati “Nimusobanurire barumuna banyu amasomo bityo bizatuma nabo batsinda kandi bikomeze ubumwe bwanyu”

Yongeyehp ko iyo abanyeshuri bari muri AERG batsinzwe bigira ingaruka kurio FARG kuko ariyo  yahawe inshingano na Leta zo kubarihira amasomo.

Ati “iyo mutsinze turatsinda, mwatsindwa natwe tugatsindwa. Bityo rero mukomeze imihigo yanyu yo gutsinda kandi abafite ibibazo bitabashije gukemurwa, tuzabikemura vuba aha.”

Buri mwaka AERG-CE itegura iki gikorwa mu rwego rwo gusezera kubacyuye igihe no guha ikaze abanyeshuri bashya mu muryango. Haba kandi na gahunda yiswe Back Home ( Garuka mu bawe) aho batumira abahoze muri uwo muryango ariko bashoje amasomo yabo kugira ngo basangize barumuna babo ubunararibonye .

NIZEYIMANA Jean Pierre
ububiko.umusekehost.com