“Muzika ya Gakondo nayo tugomba kuyibutsa urubyiruko rw’ubu”- Jules Sentore

Rwamwiza Bonheur uzwi cyane muri muzika nka Jules Sentore umwe mu bahanzi batowe 10 bari mu irushanwa rya Primus Guma Guma Super Star ku nshuro ye ya mbere, aratangaza ko muzika Gakondo idakwiye kuzimira.

Ibi Jules Sentore abitangaje nyuma y’aho akoreye igitaramo cye cya mbere cya roadshow i Rusizi agasanga abantu bazi indirimbo ze mu gihe yibwiraga ko zitageze hanze ya Kigali.

Mbere yo kujya ku rubyiniro (stage) i Rusizi Jules yaganiriye n’umunyamakuru w’Umuseke ku muziki gakondo, n’icyo yumva agiye gukora imbere y’abantu baba bamenyereye cyane imiziki igezweho.

Yagize ati”Ntibyoroshye kujya imbere y’abantu ibihumbi n’ibihumbi ukaririmba indirimbo zimwe na zimwe zituje, gusa nanone uko byagenda kose ngomba kurwana intambara natangiye yo gukundisha urubyiruko indirimbo gakondo”.

Yakomeje avuga ko nubwo hari uduce tumwe na tumwe tutarumva neza injyana aririmbamo kubera gushaka indirimbo zibyinitse gusa, avuga ko azashaka icyo yakora cyose abakunzi ba muzika ndetse n’abe muri rusange bakishimana nawe mu njyana gakondo.

Biteganyijwe ko ingendo za Guma Guma zizakomereza i Nyamagabe kuri uyu wa gatandatu tariki ya 29 Werurwe 2014.

Joel Rutaganda
ububiko.umusekehost.com