Muzika nyarwanda imaze kugera ku ntera ishimishije- Alpha

Alpha Rwirangira umuhanzi w’umunyarwanda ubarizwa muri Leta Zunze Ubumwe z’Amerika mu Mujyi witwa Campbellsville muri Leta ya Kentucky, aho yagiye kwiga amasomo ajyanye n’ubushabitsi mu muzika (Music business and  Management) aratangaza ko abona hari impinduka ziri kugenda zigaragara muri muzika nyarwanda.

Mu kiganiro na UM– USEKE, Alpha yagize byinshi atangaza kuri muzika nyarwanda aho abona igeze nk’umuhanzi utakibarizwa mu Rwanda ariko ukurikirana itera mbere rya muzika.

UM– USEKE: Muraho neza Alpha?

Alpha: Muraho muraho!!!

UM– USEKE: Amakuru y’imahanga?

Alpha: Sha ndaho nta kibazo kabisa ndakomeye.

UM– USEKE: Alpha se aho ubona uko ukurikirana muzika nyarwanda cyangwa abahanzi baba bagezweho mu Rwanda?

Alpha: Yea ndayikurikirana uko bwije n’uko bucyeye kuko ngomba kumenya iterambere ry’igihugu cyanjye kuko ndagikunda.

UM– USEKE: Ubona kuri ubu muzika nyarwanda yifashe ite ugereranyije no mu myaka ishize?

Alpha: Guys, mbabwije ukuri muzika nyarwanda igeze ku ntera ishimishije cyane kuko ubu mu Karere k’Afurika y’Iburasirazuba usanga bavuga u Rwanda nk’igihugu gikomeye cyane kuko abahanzi b’Abanyarwanda bamaze kwerekana ko bashoboye bitewe n’uko bamaze gukorana indirimbo n’abahanzi bakomoka muri ibyo bihugu.

UM– USEKE: Alpha uherutse gushyira hanze amashusho y’indirimbo nshya wakoranye n’umunyamerikakazi iyo ndirimbo muyita “Heaven”, ese ntabwo yigeze akugora?

Alpha: Hahahhaahahaa..sha ntabwo yangoye kuko yanabigizemo uruhare kuba iyo ndirimbo yakorwa, kuko yumvise indirimbo yanjye yitwa “African Swagger” arayikunda cyane, biza gutuma rero dukorana iyi ndirimbo twise “Heaven” kuri ubu usanga iri ahantu henshi hatandukanye.

UM– USEKE: Nta yindi ndirimbo se uteganya gushyira hanze vuba?

Alpha: Indirimbo irahari nshaka kuzabagezaho vuba nakoranye na Dr Jose Chameleon ukomoka muri Uganda, gusa ndayibatuye!!Hahahaha

UM– USEKE: Ko ubivuga useka Alpha?

Alpha: Yea…ni uko nzi neza ko nimuyumva izabashimisha cyane kandi bamwe bakanatungurwa n’uburyo ikoze.

UM– USEKE: Urateganya kugaruka ryari mu Rwanda?

Alpha : Ndateganya kuzaza mu mpera z’uyu mwaka nko mu kwezi k’Ukuboza.

UM– USEKE: Sawa urakoze cyane ku kiganiro tugira Alpha!

Alpha: Murakoze cyane namwe kandi ndanabashimira uburyo mudahwema kuduteza imbere nk’abahanzi, Imana ijye ibahemba kabisa.

Alpha Rwirangira yamenyekanye cyane ubwo yegukanaga irushanwa rya Tusker Project Fame session 3, na nyuma akaza kongera akegukana iryo rushanwa noneho rihuriwemo n’abahanzi bose bagiye baryegukana mbere n’abageze kuri finals.

Reba amashusho y’indirimbo Alpha aherutse gushyira hanze yise “Heaven” afatanyije na LaMyia Good.

https://www.youtube.com/watch?v=vexxYfpqt0k&feature=youtube_gdata_player

Joel Rutaganda
UM– USEKE.RW