Murekezi aributsa Abanyarwanda icyo Zaburi y’100 umurongo wa 3 ivuga

Kuri iki cyumweru, Minisitiri w’Intebe Anastase Murekezi wari uhagarariye Perezida Kagame mu giterane ngarukamwaka gihuza amatorero n’amadini mu Rwanda kitwa RWANDA SHIMA IMANA, yagaragagaje ko nubwo ari umunyapolitiki, ari n’umuntu usenga aho yibukije ko Zaburi y’100 umurongo wa gatatu ivuga ko abantu bose bagomba guhora bashima Imana kuko ari yo itanga byose.

Rwanda Shima Imana y’uyu mwaka kuri Stade Amahoro ntabwo yitabiriwe n’abantu benshi, igice kinini cya Stade yari cyambaye ubusa, gusa hari abantu bakitabiriye nanone barimo ba Minisitiri w’umuco na Siporo, Minisitiri w’iterambere ry’umuryango, Minisitiri w’ubutegetsi bw’igihugu, abahagarariye abadini anyuranye n’imiryango ishamikiye ku madini, amakorari n’abaturage babarirwa mu bihumbi bitandatu…

Minisitiri w’Intebe Murekezi muri iki giterane yavuze ko yatumwe na Perezida Kagame gushimira abanyamadini uruhare bagira mu kubaka igihugu kandi abasaba kurushaho.

Anastase Murekezi avuga ko gushima Imana ari ingenzi mu buzima bwa muntu ndetse no mu buzima bw’igihugu muri rusange.

Ati “Nkuko bigaragara muri Zaburi y’100 umurongo wa 3, abantu bose tugomba guhora dushima Imana kuko niyo itanga byose. Abanyarwanda tugomba gushima Imana kuko niyo iduha byose, tuyituye abana bacu, ababyeyi bacu n’imiryango yacu.

Gushima Imana tuba twubahiriza umuco w’abakurambere w’umuganura aho bashimiraga Imana umusaruro babonye buri mwaka.”

Mu ijambo risa n’isengesho, Minisitiri w’Intebe ati “Turashima Imana uburyo ibana natwe mu rugamba rwo kubaka ubumwe bw’abanyarwanda no guteza imbere igihugu cyacu.

Turashima Imana ko u Rwanda rukomeje kuba nyabagendwa kdi rukaba rwubashywe ku isi hose.”

Murekezi yasabye amadini gukomeza kugira uruhare muri gahunda ziteza imbere abanyarwanda, asaba umuhate wayo mu kwimakaza gahunda ya Ndi Umunyarwanda, guca amakimbirane mu ngo, kwimakaza umutekano, guca abana bata ishuri bakajya mu mihanda, no gukangurira abanyarwanda kugira mitiweri.

Muri iki giterane mpuzamatorero n’amadini humviswe inyigisho za Musenyeri Alexis Bilindabagabo, umuyobozi wa Peace Plan Rwanda itegura iki giterane mu Rwanda, amasengesho ya Apotre Paul GItwaza n’abandi.

Insanganyamatsiko y’iki giterane uyu mwaka ni “Rwanda Murika, umurikire amahanga”.

UM– USEKE.RW