“Mureke twibuke Jenoside duharanira Kwigira” – Nkosazana D. Zuma

Kuri iki cyumweru ku kicaro gikuru cy’Umuryango w’ubumwe bw’Afrika ( African Union) i Addis Abeba muri Etiyopiya, bunamiye inzirakarengane zazize Jenoside yakorewe abatutsi muri Mata 1994.

Nkosazana Dlamini Zuma, uyoboye uyu muryango yatangaje ko kuri iyi nshuro ya 19 hibukwa ibyabaye mu Rwanda ari umwanya wo gukumira ikindi cyose cyazatuma habaho indi Jenoside ari muri Africa cyangwa ahandi ku Isi.

“uyu munsi turibuka kandi tuzahora twibuka abanyarwanda bazize Jenoside binyuze muri iki gikorwa cyo kwibuka k’umugaragaro” byavuzwe na Nkosazana

Ati “ mureke twibuke Jenoside yo mu Rwanda duharanira kwigira nkuko insanganyamatsiko uyu mwaka bemeje ibivuga”

Nkosazana Dlamini Zuma yatangarije abaraho ko bongeye kandi kwibuka andi mamiliyoni y’abanyafrika bazize amakimbirane adafite aho ashingiye ahubwo ko hirengangijwe uburenganzira bw’ikiremwamuntu.

Yakomeje yerekana ko Afrika igifite ibibazo byo kubahiriza uburenganzira bwa muntu ko ahubwo nk’Umuryango w’ubumwe bwa Afrika bagomba gushishikariza ibihugu bya Afrika kubahiriza no gushyira mu bikorwa uburenganzira mpuzamahanga bw’ikiremwamuntu.

Abari aho bateze amatwi inyigisho y’umwana w’umunyeshuri waho wavuze kubyo yigiye Jenoside yakorewe Abatutsi mu Rwanda.

Nyuma ye ubwo Madamu Nkosazana yavugaga, yagize ati “ niba abana bato bazi neza ko bashobora guhindura amateka ni gute twe abakuze tutabigiraho ndetse tukabatera n’inkunga?”

Tewodros Adhanom Minisitiri w’ububanyi n’amahanga wa Etiopiya yavuze ko Africa isangiye amateka mabi yayiranze yateye ihungabana mu bayituye.

Yongera kwibutsa ko abakuru bibihugu byose bigize uyu muryango bagomba guharanira kugera ku ntego z’umuryango w’ubumwe bw’ Afrika wita ku burenganzira bwa muntu ( AU Human Rights Memorial), washinzwe muri Mutarama 28 ,2012.

globaltimes.cn

Grancieuse UWADATA
UM– USEKE.COM