Munezero Fiston wa Rayon yatangiye imyitozo muri Simba SC yo muri Tanzania

Myugariro w’ikipe y’igihugu Amavubi Munezero Fiston uri mu minsi ya nyuma y’amasezerano ya Rayon sports, Yamaze gutangira imyitozo muri Simba Sports Club kandi agiye kuyisinyira imyaka ibiri.

Munezero Fiston w’imyaka 29 yabanje kugorwa no kubona ibyangombwa by’inzira kuko afite ubwenegihugu bubiri (u Rwanda n’u Burundi) ariko yujuje ibisabwa ajya mu mujyi wa Dar es Salam muri Tanzania kuri iki cyumweru tariki 5 Kamena 2017, aho yagiye kurangiza ibiganiro n’ikipe ye nshya.

Simba Sports Club yatangiye kumushaka yatangiye kumushaka mu mpeshyi y’umwaka ushize ariko ntiyumvikana na Rayon sports yari ifitanye amazerano n’uyu mugabo.

Ubu amasezerano ye kuko ari kugana ku musozo (azarangira Tariki 4 Nyakanga 2017), yafashe umwanzuro wo kujya gukina hanze aho kongera amasezerano muri Rayon yahesheje ibikombe bibiri; icy’Amahoro 2016, n’icya shampiyona 2017.

Munezero wamaze gutangira imyitozo yabwiye Umuseke ko atarabona byinshi byo gutangaza kuri gahunda ye na Simba kuko atarasinya amasezerano nubwo ibiganiro byagenze neza, gusa ngo imyaka ibiri azayisinya muri iki cyumweru.

Munezero watangiye gukinira Amavubi muri 2015, yakiniye andi ma-Clubs nka; Inter Star Flambeau de l’est z’i Burundi, Sunrise FC na Rayon sports zo mu Rwanda.

Roben NGABO

UM– USEKE