Mukeshimana umaze imyaka 8 ari Umumotari arahamagarira abagore gutinyuka imyuga yose

Mukeshimana Vestine, umubyeyi w’abana bane, nyuma y’imyaka umunani atwara abagenzi kuri Moto kandi bikaba ngo byaramuteje imbere we n’umuryango we, arahamagarira abagore bagenzi be gutinyuka uyu mwuga nabo bakawitabira kuko ngo ari mwiza.

Mu kiganiro yagiranye n’Umunyamakuru wacu, Mukeshimana Vestine utuye mu Karere ka Kicukiro, mu Murege wa Nyaruguru, Akagari ka Kamashashi, yavuze ko akunda Ubumotari kuko bumutungiye abana, kandi bumufatiye runini mu iterambere rye n’umuryango we.

Mukeshimana ngo yatangiye uyu mwuga mu mwaka wa 2008, nyuma y’uko umugabo we yitabye Imana, akamusigira abana bane, umukuru afite imyaka 16, agakurikirwa n’impanga ebyiri zifite imyaka 14, uwa nyuma afite 10.

Amaze kubona ko ubuzima bugoye kandi afite abana, mbere yo kuba Umumotari yabanje gukora akazi k’ubuyede, afasha Abafundi kubaka inzu.

Aka kazi k’Ubuyede ngo yaje kubona ko katari ku mwinjiriza nk’uko abyifuza, nibwo yaje gufata umwanzuro wo gushaka ibindi yakora kugira ngo abone gutunga abana be.

Mukeshimana yaje gukora kuri Station ya Essence, ariko baza kumwimurira ahantu kure nabyo abivamo.

Mukeshimana ati “Mfushije umugabo nibwo nabonye agaciro k’ubuzima. Uretse ko na mbere kose nakundaga akazi gakorwa n’abagabo,…mbonye byose byanze mpita mfata icyemezo cyo gukora akazi k’ubumotari, ubu kantungiye umuryango.”

Mukeshimana avuga ko yatangiye gutwara abagenzi, utumoto duto tuzwi nka “Velo moteri”, none ubu asigaye atwara moto nini.

Kugeza ubu, uyu mubyeyi ufite n’uruhushya rwo gutwara imodoka rwo mu kiciro (category) B. Mu nzozi afite, harimo kuzatwara imodoka nini zizwi nk’Ikamyo, dore ko ngo ubu ari murugendo rwo gushaka uruhushya rwo gutwara ikinyabizi (Permis de Conduire) rwamwemerera kuzayitwara.

Umwuga w’Ubumotari uramutunze, unarihira abana be biga mu mashuri yisumbuye batatu (3), n’umuto muri bo umwe wiga mu mashuri abanza.

Kugeza ubu Mukeshimana ari mu nzu akodesha, ariko ngo yamaze kwigurira ikibanza kandi ngo afite intego ko uyu mwaka uzarangira yamaze kwiyubakira inzu ye bwite.

Mukeshimana mubyo akora byose, ngo ateganya aba ateganyiriza abana be ejo heza, kuko atifuza ko abana be bazahura n’ubuzima bubi.

Uyu mubyeyi watinyutse kandi uha agaciro umwuga uwo ariwo wose, asaba abagore bagenzi be, gutinyuka ntibagire ubwoba bw’umwuga uwo ariwo wose, kuko ngo imyuga ikorwa n’abagabo nabo bayikora kandi ikabatunga.

Daddy SADIKI RUBANGURA
UM– USEKE.RW