Muhanga:Umuryango ‘Nzambazamariya’ ngo ugiye kurushaho kwegera abatishoboye

Mu nama rusange yahuje abagize Umuryango Nzambazamariya Véneranda n’Ikigo cy’igihugu cy’imiyoborere (RGB) kuri uyu wa gatandatu, abanyamuryango b’uriya mu muryango biyemeje ko bagiye kurushaho kwegera abatishoboye kugira ngo bazamure imibereho myiza yabo.

Iyi nama rusange yabereye mu karere ka Muhanga, yibanze cyane cyane ku ntego umuryango Nzambazamariya Véneranda ufite ndetse n’impamvu yatumye ushingwa harimo kwibutsa abanyamuryango bashya ko inyungu ya mbere ari ugufasha abakene kandi utarambirije ku nkunga y’abagiraneza.

Ngo bigiye hamwe uburyo bakomeza kwishakamo imbaraga badategereje inkunga y’abagiraneza kuko hari igihe iza itinze ndetse rimwe na rimwe ikabura.

Iyi nama rusange yabaye umwanya mwiza wo gukebura bamwe mu banyamuryango bazi ko iyo umuntu yinjiye mu muryango aba agiye gukira bakiyibagiza ko inshingano z’Umuryango ari uguharanaira inyungu rusange z’igihugu n’abaturage by’umwihariko.

Mukayiranga Annonciata ushinzwe gukurikirana ibikorwa by’Umuryango Nzambazamariya Vénéranda, yavuze ko hari igihe babona inkunga idahagije kandi umubare w’abaturage batishoboye babaruye ari munini bikaba ngombwa ko buri munyamuryango yikora ku mufuka.

Yagize ati: “Hari aho twumva abanyamuryango banyereje amafaranga y’abaturage, ibyo nibyo tugomba kwirinda kugira ngo ejo bye kuzatubaho»

Habimana Celestin wo mu Karere ka Nyamagabe avuga ko usibye abanyamuryango batuzuza neza inshingano zabo, hari na bamwe mu bayobozi batarabasha gukorera mu mucyo ari nabo kenshi bashinjwa kunyereza imitungo y’abaturage batishoboye.

Ibi ngo bituma bagirana amakimbirane n’aba bayobozi ari nayo mbogamzi ahanini bakunze guhura nayo.
Ku ruhande rw’Umuyobozi ushinzwe imitwe ya Politiki n’amadini, mu kigo cy’igihugu cy’imiyoborere (RGB) Barihuta Aimée, yibukije abanyamuryango bashya ndetse n’abasanzwe ko inshingano nyamukuru z’umuryango ari ukuba imboni z’abo bahagarariye.

Ngo iyo hari ikatagenda neza habaho kuganira n’abo bireba bakibukiranya ko inshingano ya mbere ari uguha abaturage service nziza.

Umuryango Nzambazamariya Véneranda watangiye mu mwaka wa 2000 mu karere ka Muhanga, Nyamagabe, Nyaruguru, Bugesera na Rutsiro.

Ufasha abaturage batishoboye kwibumbira mu matsinda abyara inyungu, no kwigisha abatazi gusoma kwandika gusoma no kubara. Uyu muryango kandi ufite intego yo kurwanya ihohoterwa rikorerwa mu ngo.

MUHIZI ELISEE
UM– USEKE. Rw/Muhanga