Muhanga: Unity Club yemeza ko hari ‘Abarinzi b’Igihango’ bagize uruhare muri Jenoside

Mu  biganiro byahuje  inzego zitandukanye  mu Karere ka Muhanga, abagize Unity  Club, na Komisiyo y’igihugu y’Ubumwe n’Ubwiyunge, umunyamabanga nshingwabikorwa wa Unity Club, Iyamuremye Regine, yatangaje ko  bagiye kongera gutoranya abarinzi b’igihango kubera ko bamwe mu bari batowe, basanze baragize uruhare muri  Jenoside yakorewe Abatutsi muri 1994.

Hashize amezi abiri igikorwa cyo gutoranya abarinzi b’igihango  mu tugari n’imirenge kibaye, amwe  mu mabwiriza yagengaga iki gikorwa yavugaga ko hagomba gutoranywa umuntu wese wagize ibikorwa by’indashyikirwa mu bihe bitandukanye igihugu cyanyuzemo, harimo n’ibihe bya  Jenoside yakorewe abatutsi  mu 1994 akirinda kuyigiramo urugare urwo arirwo rwose.

Mbere amabwiriza yagengaga uburyo bwo gutoranya abarinzi b’igihango ntiyabuzaga abantu bagize uruhare muri Jenoside gutorwa, ari nayo mpamvu bashingiyeho bakuramo abo icyaha cya Jenoside cyahamye bari baratoranyijwe  muri gahunda y’abarinzi b’igihango.

Mu mabwiriza harimo ingingo hari umubare w’abantu bane muri buri kagari ndetse n’imirenge, barimo abaturage babiri n’abayobozi babiri bakoze ibikorwa by’indashyikirwa mu bihe bitandukanye igihugu cyanyuzemo bagombaga gutorwa.

Umunyamabanga nshingwabikorwa wa Unity Club, Iyamuremye Regine, wari umushyitsi mukuru muri ibi biganiro, avuga ko  ku ikubitiro  bagiye kuvanamo abakoze jenoside yakorewe Abatutsi mu Rwanda kubera ko  iki cyaha kidasaza kandi ko umuntu  adashobora kuba inyangamugayo mu gihe cyose yahamwe n’icyaha cya Jenoside.

Ndayisaba Aimable, umunyamabanga Nshigwabikorwa w’Umurenge wa Nyabinoni, yasobanuye ko  mu gutoranya abarinzi b’igihango bibanze cyane cyane ku bantu bahishe Abatutsi muri Jenoside, ndetse ngo baje gukora ibikorwa by’ingenzi na nyuma y’aho.

Gusa yasobanuriwe ko mu gutoranya abarinzi b’igihango batakwiye kugendera ku mateka  ya vuba  igihugu kivuyemo ko ahubwo  bagomba  gushingira ku bihe bitandukanye u Rwanda rwanyuzemo ari nabyo bishyira aba bantu  muri uru rwego.

Umukuru w’igihugu  Paul Kagame, akaba ari we wabanje guhabwa igikombe nk’ Umuyobozi waharaniye ubumwe n’ubwiyunge, ku mwanya wa kabiri hakaba harahembwe  Amashyirahamwe y’abantu banyuranye yakoze ibikorwa by’indashyikirwa.

MUHIZI ELISEE

UM– USEKE.RW-Muhanga.