Muhanga: Umuyobozi wa ADPR ku rwego rw’igihugu yasabye imbabazi abarokotse

Mu muhango wo kwibuka ku nshuro ya 21 Abatutsi 500 barenga biciwe ku rusengero rw’ADEPR i Nyabisindu,  Pasiteri Sibomana Jean Umuvugizi w’iri torero ku rwego rw’igihugu, yasabye imbabazi  abarokotse n’Abanyarwanda muri rusange kubera  uruhare bamwe mu bayobozi b’iri torero bagize muri Jenoside yakorewe Abatutsi mu 1994.

Mu ijambo rye, Pasiteri Sibomana Jean yagarutse ku ruhare rwa bamwe mu bayobozi  batandukanye b’amadini ndetse n’amatorero harimo n’iryo abereye Umuyobozi ryatije umurindi abicanyi bikagera n’aho batanga Abatutsi bari babahungiyeho bazi ko bagiye kurokoka ariko bakicwa.

Sibomana wavuze mu izina rya bagenzi be bafatanya kuyobora itorero rya ADEPR, yemeza ko hari umubare munini w’abari abayobozi b’itorero rye, bateshutse ku nshingano za Gikristo bica abashumba n’Abakristo bitwaza ko badasangiye icyo bitaga ubwoko icyo gihe.

Yavuze ko ibyabaye bitazongera kubaho haba mu buyobozi bw’itorero n’ahandi mu Rwanda, ati “Nsabye  imbabazi mbikuye ku mutima, nongeye gusabira imbabazi bagenzi banjye  dufatanyije uyu murimo, twateshutse ku nshingano.”

Ntagungira Francois, wavuze  mu izina ry’abarokokeye i Nyabisindu, yatanze ubuhamya avuga ko, usibye kuba abayobozi  baratanze Abakristo  ngo bicwe,  bagambaniye  na bamwe mu ba pasiteri bari bafatanyije kuyobora itorero babica urupfu rw’agashinyaguro.

Yavuze ko hari bamwe muri abo bashyize mu ngorofani mbere yo kubica, bagenda babakurura  kugeza umwuka ushyizemo, babaroha mu cyobo rusange.

Mutakwasuku Yvonne, Umuyobozi w’Akarere ka Muhanga,  wari waje kwifatanya n’Abakristo b’iri torero, yavuze ko hari bamwe mu Bakristo kugeza n’uyu munsi batari biyumvisha akamaro ko kwibuka,  kuko  hari ababikora nk’umuhango abandi bakabiterwa n’uko gusa abayobozi babo babyitabiriye.

Yasabye buri wese kwibaza impamvu ituma Abanyarwanda bibuka, avuga ko kwibuka ari uguha agaciro abakambuwe.

Usibye  igikorwa cyo gusaba imbabazi ndetse n’ubuhamya byavugiwe muri uyu muhango, Umuvugizi w’Itorero ADEPR, yavuze ko  muri iyi minsi 100 yahariwe kwibuka, hari ibyo bamaze gukora birimo kuremera abarokotse Jenoside batishoboye, ndetse no  kwibuka Abatutsi bose biciwe mu matorero.

MUHIZI Elisee
UM– USEKE.RW