Muhadjiri ntazakina umukino wa Rayon, azamara ibyumweru 6 adakina

Umukinnyi wo hagati w’ikipe y’igihugu Amavubi na APR FC Muhadjiri Hakizimana yavunikiye mu myitozo. Yamaze kwitabwaho n’abaganga bamushyizeho ‘plâtre’ bita ciment. Azamara ibyumweru bitandatu adakora ku mupira.

Mu ijoro ryo kuri uyu wa kane tariki 11 Mutarama 2016 nibwo Muhadjiri Hakizimana yajyanywe kwa muganga ngo yitabweho kuko nyuma y’imyitozo yavunikiyemo bikomeye yavanwe ku kibuga cy’imyitozo ajyanwa mu modoka bamuhetse.

Abaganga basanze yavunitse amagufa yo mu kagombambari bamushyiraho ‘plâtre’ imurinda kunyeganyega kw’amagufa byatuma atonekara. Iyi bita Ciment azayimarana ibyumweru bitandatu atangire imyitozo yoroheje. Nyuma y’amezi abiri nibwo azasubira mu kibuga.

Muhadjiri watsinze ibitego byinshi muri shampiyona y’umwaka ushize (16)  azasiba imikino isigaye ku gice cya mbere cya shampiyona APR FC izahura na Marine FC kuri uyu wa gatanu, na Rayon sports tariki 21 Mutarama, na Bugesera bazahura tariki 29 Mutarama 2016.

Uyu musore APR FC ayakuye muri Mukura VS kandi azasiba imikino ibiri ya CAF Champions League bazakina na Zanaco FC yo muri Zambia. Umukino ubanza uzabera i Lusaka hagati ya tariki 10–12 Gashyantare n’uwo kwishyura uzaba hagati ya tariki ya 17–19 Gashyantare 2017.

Roben NGABO

UM– USEKE