Bigbrother Africa, Arthur na Frank Joe batangiranye amahirwe

Ku nshuro ya 9 irushanwa rya Bigbrother Africa ku nshuro ya mbere u Rwanda rufite abaruhagarariye muri iryo rushanwa, Nkusi Arthur ndetse Frank Joe babashije kwitwara neza ubwo iryo rushanwa ryatangizwaga ku mugaragaro mu ijoro ryakeye ryo ku wa 5 Ukwakira 2014.

Uko iri rushanwa ryatangiye, buri umwe uko yazaga yabanzaga kuririmba cyangwa se yaba ari umunyarwenya agasetsa abantu. Bityo bagahabwa amanota uko bagiye barushanwa n’abantu bari aho muri icyo gitaramo.

Frank Joe niwe wa mbere wahamagawe kwinjira mu nzu izaberamo iri rushanwa mu gihe kigera ku minsi 62, igihe kigera ku mezi abiri n’iminsi ibiri.

Mu kugera ku rubyiniro (Stage)  yahise aririmba indirimbo ye yise “Bubly Bubly”, yaje gutuma abona amanota agera kuri 64.3% yatumye agirirwa ikizere cyo kuba ashobora kuzagira aho agera.

Nyuma y’aho hagiye hahamagarwa abandi nabo bakaza bakaririmba abandi bagasetsa abantu.

Bidatinze haje guhamagarwa Nkusi Arthur umunyarwenya usanzwe umenyerewe mu Rwanda, akigera kuri stage yasekeje abantu bitangaje bimuviramo kubona amanota 77.5% ku ikubitiro, byamuhesheje umwanya wa gatatu naho Joe aza ku mwanya wa karindwi muri 26.

Bakigera muri iyo nzu BigBrother yabamenyesheje ko mu cyumweru cya mbere bagomba kwitoranya bo ubwabo abazasohoka bwa mbere, bityo Umunyatanzania Laveda wagize amanota 85.0% ahabwa kuyobora abandi mu gihe kingana n’icyumweru (Head of the House).

Muri iri rushanwa abaririmo bose nyuma y’icyumwe cya mbere bagomba kwihitamo abazataha, abantu bazatangira kugenda batora (mu butumwa bugufi na Internet) uvamo buri cyumweru bitewe n’uko abanira abandi.

Uwegukanye iri rushanwa ashyikirizwa igihembo gishobora kugera ku 300 000USD ahabwa cash. Dillish Pearl Mathews wo muri Namibia niwe uherutse kwegukana iri rushanwa umwaka ushize.

Joel Rutaganda
UM– USEKE.RW