Misiri: Televiziyo y’igihugu yahagaritse by’agateganyo abanyamakuru b’abagore babyibushye

Ikigo cy’igihugu cy’itangazamakuru mu gihugu cya Misiri cyahagaritse mu gihe cy’ukwezi abagore 8 b’abasomyi b’amakuru n’abakora ibiganiro kuri Televiziyo y’igihugu, basabwe kubanza kugabanya umubyibuho kugira ngo bajye bagaragara neza.

Uyu mwanzuro wamaganiwe kure n’imiryango ishinzwe kuvugira abagore, ndetse n’abandi bantu batandukanye.

Uwafashe uyu mwanzuro nawe ni umugore uyobora ikigo gihuza radio na televiziyo by’igihugu (Egyptian Radio and Television Union) Safaa Hagazy, kandi nawe yahoze ari umusomyi w’amakuru kuri televiziyo y’igihugu.

Abafatiwe iki cyemezo ntibacyakiriye neza kuko bavuga ko kitabereye, ndeste ko ari n’ibintu bagombaga kuganirira imbere mu kigo.

Ikinyamakuru Al-Yawm Al-Sabi dukesha iyi nkuru cyatangaje ko umwe mu bahagaritswe witwa Khadija Khattab usanzwe ukora ibiganiro kuri ‘Channel’ ya kabiri ya televiziyo y’igihugu, yatangaje ko abasanzwe bamukurikira bakwiye kumureba mu biganiro aheruka gukora bakareba koko niba abyibushye cyane ku buryo yahagarikwa mu kazi.

Undi munyamakuru nawe wahawe icyo kiruhuko yavuze ko ari icyemezo kigayitse, ngo ni icyemezo cyababaje imiryango yabo, akavuga ko ari ibintu bagombaga kuganirira mu kazi kabo bitagiye hanze.

Ikigo gishinzwe amabwiriza n’imyitwarire y’abagore muri iki gihugu nacyo cyamaganiye kure iki cyemezo, cyavuze ko ari uguhonyora itegekonshinga ndetse no guhohotera igitsina gore.

Iki kigo cyahamagariye ikigo cy’igihugu cy’itangazamakuru mu Misiri gukuriraho icyo cyemezo abo bagore n’abakobwa bahagaritswe.

Nubwo uwo mwanzuro wakomeje kunengwa, ngo hari impungenge ko icyo cyemezo kitazasubirwamo, kandi ngo n’imishahara y’abo bagore muri uku kwezi yarahagaritswe.

Iki cyemezo cyanagarutsweho n’abantu benshi ku mbuga nkoranyambaga aho bamwe bagiye bavuga ko ari ugupyinaganza uburenganzira bw’abagore.

Callixte Nduwayo
UM– USEKE.RW