Misiri : Hosni Moubarak yakatiwe imyaka itatu y’igifungo kubera ruswa

Uwahoze ari Perezida wa Misiri Hosni Moubarak kuri uyu wa gatatu yakatiwe igifungo cy’imyaka nyuma yo guhamwa n’ibyaha bya ruswa.

Muri Kamena 2012, Hosni yari yakatiwe gufungwa burundu ashinjwa gutegeka ingabo zari ize kurasa mu baturage bigaragambyaga bashaka kumuhirika ku butegetsi mu 2011, gusa icyo cyemezo urukiko rusesa imanza rwasabye ko cyazongera kuburanishwa.

Hosni Moubarak w’imyaka 85 y’amavuko, yari yaraburanishijwe mu rukiko rw’ibanze mu mujyi wa Cairo ibyaha bya ruswa, akaba ashinjwa kuneyereza akayabo ka miliyoni 125 z’ama livres akoreshwa mu Misiri (agera kuri miliyoni 13,5 z’ama Euro), ibyaha ngo yaba yarakoranye n’abahungu be Gamal na Alaa.

Hosni Moubarak kandi ashobora kuzahanishwa gufungwa ubuzima bwe bwose muri gereza, nyuma y’aho hari ibirego bimushinja gutanga amabwiriza ku bari abasirikare ba Misiri mu gihe cy’ubutegetsi bwe, yo kurasa mu baturage bigaragambyaga bamusaba kuva ku butegetsi.

Urubanza rwari rwabereye mu rukiko rw’ibanze rwa Cairo, muri Kamena 2012, Moubarak akaba yari yasabiwe gufungwa burundu ariko urukiko rusesa imanza ruza gukuraho icyo cyemezo rutegeko ko urubanza rwazasubirwamo.

Urubanza rwa Hosni Moubarak, rwatinze cyane mu itangazamakuru gusa kuri ubu ntirukivugwa ko amaso ahanzwe uwari Perezida wa mbere watowe n’abaturage mu mateka ya Misiri, Mohamed Morsi, wahiritswe ku butegetsi nyuma y’igihe gito atowe, ubu hashize amazei 11, we akaba akurikiranyweho ibyaha bikomeye n’ubutegetsi buriho ubu.

Jeuneafrique

ububiko.umusekehost.com