Misiri: Abashakashatsi bavumbuye izindi mva zerekana uko ba Pharaon babagaho

Itsinda ry’abahanga mu byataburuwe mu matongo bo muri USA  (archaeologists) bataburuye imva zo mu Misiri ziherereye mu kibaya cya Luxor  basangamo inkuta zitangaje, zifite ibishushanyo bigaragara neza byerekana uko ubuzima bwa Pharaoh Amenhotep bwari bumeze kimwe n’abandi bare baruye hafi aho. Uyu mwami yabayeho guhera ahagana muri 1543 kugeza 1292 mbere y’uko Yesu aza ku Isi.

Amafoto yashyizwe hanze na Minisiteri y’ubushakashatsi mu mateka ya  Misiri yak era yerekana inkuta nini kandi zishushanyijeho amashusho yerekana uko abantu ba kera bizihizaga iminsi mikuru mu Misiri.

Igitangaje kurushaho ni ukuntu amashusho akigaragara neza kandi amaze imyaka irenga ibihumbi bitanu ashushanyijwe.

Ku rundi ruhande ariko, Minisitiri ushinzwe amateka ya kera ya Misiri Mamdouh al-Damaty  avuga ko hari bimwe mu byari muri izi mva byibwe muri byo ngo harimo isanduku yari ibitsemo ibikomo n’imirimbo(jewelries) bashyinguranaga abantu bakomeye harimo naba Pharaon.

Kuri bimwe muri ibi bishushanyo usangamo amashusho yerekana ukuntu umugabo n’umugore bari ku meza basangira ahandi ukabona  ‘Imanakazi’(goddess)iri guha umwana w’ibwami icyo kurya n’ibindi bishushanyo byinshi.

Ikibabaje ni uko hari inyuguti zimwe zari zanditse mu nyandiko y’udusaraba( hieroglyphic texts) zasibwe bituma abahanga batabasha gusoma ngo bameneye uko ubuzima bwari bumeze neza neza muri uwo muryango.

Imva ya kabiri yo babashije kumenya nyirayo n’izina ry’umugore we. Iyi mva yari iy’uwitwaga  Sa-mut n’umugore we Ta-Khaeet.

N’ubwo bwose abahanga bataremeza neza ny’iri imva ya mbere, bavuga bakekeranya ko yari iya Se wa Sa-Mut ariwe umwami Amenhotep.

Kuri ubu umujyi wa Luxor utuwe n’abantu ibihumbi  500,000 ukaba uherereye mu nkengero z’Uruzi rwa Nili mu Majyepfo ya Misiri.

Ni agace k’ingenzi cyane mu bushakashatsi bw’abanyamateka bashaka kumenya uko abaturage ba Misiri ya kera babagaho ariko cyane cyane ba Pharaon.

Mailonline

UM– USEKE.RW