Minisitiri w’Intebe yasabye amatorero y’Abaporoso kunga Ubumwe

Gukomeza kugira ubumwe no gufatanya na guverinoma ni bimwe mubyo Minisitiri w’Intebe Anastase Murekezi yasabye  amatorero ya gikiristitu mu ijambo yagejeje ku bitabiriye ibirori by’isabukuru y’imyaka 50 inama y’Abaporotesitanti mu Rwanda (CPR) imaze ishinzwe kuri uyu wa gatandatu tariki 16 Kanama 2014.

Minisitiri Murekezi yababwiye ko kwizihiza  umunsi nk‘uyu ari umwanya mwiza wo gusubiza amaso inyuma, bakareba  ibyagezweho muri iyo myaka ishize, bakabyishimira ariko bakanakosora ahagaragaye intege nke, ndetse bakanafata n’ingamba zo gutegura ejo hazaza.

Umubare w’amatorero agize CPR wavuye kuri ane (4) ugera kuri 19 muri icyo gihe cyose.

Anastase Murekezi yashimiye CPR ko mu myaka 20 ishize yafatanyije na Guverinoma mu bikorwa byo guhindura imibereho y’abaturage mu buvuzi, ubuhinzi, uburezi no kwimakaza amahoro, ubumwe n’ubwiyunge.

Ati “Turifuza ko ubu bufatanye bwakomeza ndetse bukanarushaho gutera imbere.”

Bishop Alexis Birindabagabo Umuyobozi w’Itorero ry’Abangirikani Diyosezi  ya Gahini akaba na  Perezida wa CPR avuga ko amatorero ajya kwihuza intego ya mbere  yari afite yari ukunga ubumwe ndetse no gufatanya na Guverinoma kubaka Umuryango Nyarwanda.

Iri huriro ry’amatorero y’Abapoloso mu Rwanda rifite ibigo by’abana b’incuke, ibigo by’amashuri abanza birenga 600, amashuri yisumbuye 300 ndetse na za Kaminuza zirenga esheshatu (6). Iri torero kandi rifite ibitaro birindwi (7) mu bice bitandukanye by’u Rwanda.

Iyi Nama y’Abaporotesitanti mu Rwanda (Conseil  Protestant du Rwanda)  yashinzwe kuwa 06, Ugushyingo, 1962 ifite intego igira iti “Ngo bose babe Umwe”. Kugeza ubu igizwe n’amatorero 19 ndetse n’imiryango ine.

Itorero ry’Abangilikani rikaba bisa naho rifitemo ijambo rinini kuko rifitemo amatorero arindwi angana na Diyosezi zaryo.

Muri ayo matorero harimo afite Abakiristu benshi kandi akunze kuvugwa nka; ADEPR, EPR(Eglise Presibiteriyeni), EMLR(Abamethodiste), UEBR na AEBR (Ababatisita), Amatorero arindwi muri Diosezi za  EAR (Abangilikani), ndetse n’andi atandukanye.

BIRORI Eric
UM– USEKE.RW