Miliyoni £65 ngo Ronaldo agaruke muri Man United!

Ikipe ya Manchester United yatangiye urugamba rwo kuba yasinyisha nanone umukinnyi Cristiano Ronaldo muri iyi mpeshyi.

Manchester ngo iratekereza ko iza gufatira ku kuba uyu musore i Madrid atanezerewe no kugenda kwa Mourinho bityo bakaba bahera aho bakamugarura i Old Trafford.

Manchester United ngo yiteguye gutanga miliyoni 65 z’amapound ndetse ikagerekaho n’umukinnyi kugirango uyu musore w’imyaka 28 agaruke mu ikipe agifatwamo nk’intwari yababaniye neza.

Biravugwa ko Ronaldo nawe yaba yifuza kugenda, aherutse kwanga gusinya ku masezerano mashya yahabwaga na Real Madrid mu gihe ayo asanganywe asigaje imyaka ibiri. Nubwo Real izakomeza kumugusha neza ngo ahagume.

Bidakunze ariko Real Madrid iri gushakira igisubizo mu kizana umusore Gareth Bale wa Tettenham uri kubahagarara miliyoni 80 z’amapound nkuko bitangazwa na TheSun.

Real Madrid kandi izirikana cyane ko itareka amasezerano ya Ronaldo arangira burundu kuko byatuma nta faranga imubonamo kuko yakwigurisha, bityo hari igitekerezo cyo kumushakamo ifaranga mu gihe bigishoboka.

Ronaldo aherutse gushyira ku isoko inzu ye i Madrid ndetse ku mukino wa nyuma wa shampionat ya Espagne ntabwo yawukinnye nyuma yo kutumvikana na Mourinho wariho atoza umukino we wanyuma.

Uyu musore yaje muri Madrid mu 2009 aguzwe miliyoni £80. Nubwo i Madrid yahatwaye igikombe cya shampionat ndetse na Copa Del Rey ntabwo yigeze agaragaza ko yahanezerewe.

Uruganda rwa Nike ruri muri ‘deal’ yo kugarura Ronaldo muri Manchester United kuko rudakorana na Real Madrid yambwikwa na mukeba Adidas mu gihe uru ruganda rufite amasezerano na C Ronaldo rukanayagirana kandi na United.

JD NSENGIYUMVA Inzaghi
UM– USEKE.RW