Mgr Musengamana arasaba ababyeyi kwita ku burere bw’ abana

Mu birori byo kwizihiza umunsi ngarukamwaka witiriwe Mutagatifu Yosezu waragijwe Ishuri ryamwitiriwe rya St Josep i Kabgayi, byabaye kuri uyu wa Kane, Musenyeri Musengamana Papias wari uhagarariye Umushumba wiriya Diyoseze, yasabye ababyeyi kongera ingufu mu burere baha abana babo kuko ngo bizabera abarimu umusingi wo gutanga uburezi bufite ireme kuko nta burere nta n’uburezi buranbye bwaboneka.

Musenyeri Musengamana Papias yavuze ko  mu byo ababyeyi bakwiye kwitwararika  harimo guha abana uburere  bushingiye  ku iyobokamana bafatiye urugero rwiza  kuri Mutagatifu Yozefu waranzwe no kubaha, kumvira  no gukunda umurimo, kandi ngo ziriya ndangagaciro ni ingenzi ku munyeshuri ndetse na nyuma yo kurangiza amasomo ye akamaro kazo karakomeza.

Yasabye ababyeyi gukomera ko nshingano zabo ntubumve ko iyo umwana yageze ku ishuri inshingano zabo ziba zirangiye.

Mgr Musengamana yibukije ababyeyi ko inyigisho baha abana babo arizo  abarimu baheraho bigisha abana ibindi byose baba bakeneye mu myigire yabo n’imikurire yabo.

Ati : « Yozefu yahawe inshingano zo kurera urugo rutagatifu rw’Inazareti, yumviye Imana aha uburere bwiza umwana Yezu, yakundaga umurimo. ibi nibyo twifuriza abana turera »

Frère Akimana Innocent, umuyobozi w’Urwunge rw’amashuri  rwitiriwe Mutagatifu Yozefu, avuga ko  amasomo batanga afasha abanyeshuri kuzibeshaho bakagira ikinyabupfura kandi kikababera ishingiro n’icyerekezo  k’imibereho bifuza  kugeraho.

Yibukije abarimu ko  bagomba kuba abafatanyabikorwa n’abanyeshuri bigisha kugira  ngo babiyumvemo bityo babashe gutsinda neza.

Umunyeshuri uhagarariya abandi, Doyen, Iraguha Nshuti Elisée, Umunyeshuri uhagarariye abandi, yashimye uburyo Ikigo bigamo kibafata, avuga ko biyumva nk’abari mu muryango bakurikije uburere bahabwa n’ababyeyi, ndetse n’ubumenyi  bwisumbuye  bahabwa n’abarezi.

Yavuze ko bibongerera imbaraga  zo kwiga no gutsinda kandi ngo akanyabugabo bagaterwa nanone n’ingero z’abakuru babo  banyuze muri iri shuri.

Urwunge rw’amashuri rwitiriwe mutagatifu Yozefu, rwatangiye  mu mwaka w’1936. Rwagiye ryongera amashami kuri ubu rikaba rifite agera kuri atanu yiganjemo ay’ubumenyi(sciences)

Uyu munsi ngarukamwaka usanzwe wizihizwa  n’urugo  rwa b’Afurere b’Abayozefiti (Frères Josephites) bafatanyije n’ibigo bibashamikiyeho nk’amashuri. Urwunge rw’amashuri rwa  Kabgayi rwaragijwe Mutagatifu Yozefu ubu  rurererwamo abanyeshuri barenga 800.

MUHIZI ELISEE

UM– USEKE.RW-Muhanga.